Lavrioyî de 44 rojî yo grevê vêşanîye dewam keno: Bêvengîye bêwijdanî ya 

2021-02-17 09:12:31


	 

	 

	AMED - Berîvan Karakoyun û Fatma Verîm ê ke Yunanîstanî de kampê Lavrîo de mendê û tewrê grevê vêşanîye bîyê, dîyar kerdî ke Rayberê PKKyî Abdullah Ocalan ke bi komplo ameyo tepiştiş, fikr û fehmê ey ters awan kerdo û veng dayî ke ganî CPT wezîfeyê xo bi ca bîyaro.

	 

	Serê komployê mîyanneteweyî ke Rayberê PKKyî Abdullah Ocalan teslîmê Tirkîya amebi kerdene de 22 serrî derbaz bi û rojêke ameyo tepiştene tecrîdo giran ser de dewam keno. Tepişteyê PKKyî û PAJK 27ê Teşrîna Peyêne de bi amancê wedaritişê tecrîdî de grevê vêşanîye de yê. Kurd û dostê kurdan zî bi amancê paştdayîşê grevî cayê ke manenê de kewtê grev. Kampa Lavrîo yê Yunanîstanî de zî grev ame destpêkerdene û çalakî 44 rojî yo dewam de ya. Çalakî hetê komêke 8 kesan û her 5 rojan reyke yena dewr girewtene. Berîvan Karakoyun û Fatma Verim tewrê çalakî bî, derheqê amancê grev û tecrîdî de qisey kerdî.

	 

	'Şarê Kurdî rastî zaf baş zano'

	 

	Berîvane dîyar kerd ke çalakîya xo tena bi grev sînor nêkerdê û vat: "Ganî Abdullah Ocalan zî seke pêro tepişteyê bînan, wayîrê heqî bo. Heqê ci destê ey ra ameyê girewtene. Şarê kurdî no qetî qebul nêkeno. Sewbîna komplo her wext serê kurdan de estbi. Ma eşkenê nimûneyê şexsê Şêx Saît, Seyît Riza û embaza Sara de bidê. La tu wext ê nêresayî amancê xo. Ma pêro tepişteyê ke grev de yê selam kenê."

	 

	‘Komplo rîyê dewletan ê lêşin vet werte'

	 

	Berîvane dewam de wina vat: "Şarê Kurdî xoverdayox o. Qetî sere nêdayo ro. 7ine ra bigî heta 70 hema kurdî komployê hemverê Ocalanî ra bi tesîr bîyê. Netîceyê komployî de rîyê lêşin yê dewletan zî vejîya werte. Nika ma Yunanîstan de grev da destpêkerdiş. La zaf tay selahîytdarî yenê serdayîşê ma. Gelo çira nê xoverdayîşî nêvênenî? Çapemenîya dinya çira seba kesê ke bedenê xo dayê veê merdişî çîyêk nêkenê? Bêvengîye bêwijdanî ya. Eke dostê kurdan estê, wa wezîfeyê xo bi ca bîyarê. CPT zî xoser nîyo. Eke xoser bibayîne do wezîfeyê xo bi ca biardêne. Çareyê Kurdan yewîye yo. Roj roja azadkerdişê Rayberî yo. Ez veng dana pêro kesan. Ewro roja xoverdayîş a."

	 

	'Wa zulmê ke yenê kerdene nêrê qebulkerdene'

	 

	Fatma Verîm zî yew çalakgera tewrê grevî bîya ya û Fatma zî wina vat: "Ez pêro tepişteyan rê selam kena û vera xoverdayîşê înan rêz gêna. Tecrîd serê Abdullah Ocalanî de dewam keno û srê şarê kurdî de zî dewam keno. Ma ça bê zî ma do vera tecrîdî têkoşînê xo dewam bikerê. Ma veng danê pêro kesê bi wijdanan. Wa tepişteyê ke bedenê xo dayê verê mergî bivînê. Wa nê zulmî qebul nêkerê. Bi serran o Rayber mîyanê çar dêsan de yo û nêverdenê bi keye û avûkatanê xo dir pêvînayîş bikero. Dinya zî temaşe kerd. Ma heta peynî pey dewaya Rayberê xo de yê. Wa tecrîd bêro wedaritene û pêvnayîş bêrê destpêkerdene."