Projeyê 'Zarok Ma' bendeyê paştdayîşî yo 

2021-02-17 09:10:20


	 

	 

	Sema Çaglak

	 

	AMED - Akademîya Ma Muzîkî ke tewir bi tewir projeyan aver bena, nika zî bi projeyêk newe bi nameyê "Zarok Ma" (Tutî Ma) seba perwerdeyê tutê 2 û 5 serreyan dest bi xebatan keno. Mamosteyê Ma Muzîkî vengdayîşê paştdayîşê proje kerdî.

	 

	Akademîya Ma Muzîkî ke Amed de dimayê Konservatuarê Aram Tîgranî yê bi sloganê, "Seba her kesî muzik, her ca muzîk" serra 2017 de dest bi xebatanê xo kerd, wayîrê taybetmendîyê ke perwerdeyê muzîkî bi ziwanê kurdkî dano. Akademîya ke tewir bi tewir projeyan aver bena, nika zî bi projeyêk newe, seba perwerdeyê tutanê 2 û 5 serrî "Zarok Ma" (Tutî Ma) akeno. Projeyo ke bi paştdayîşê Enstîtûyê Goethe ameyo averberdiş, serê Fongogo de pabeyê hetkarî yo. Derheqê babete de mamosteyê Ma Mûzîkê Evîn Tîryakî û Evîndar Dûlek qisey kerdî.

	 

	'Tutî 2 û 5 serreyî do perwerde bivînê'

	 

	Mamosteyê Akademîya Ma Muzîkî Evîn Tiryakî ard ziwan ke no proje bi paştdayîşê Enstîtûyê Goethe yê Elmanya ameyo averberdayîş û wina vat: "Bi şeş mengî yo ma serê nê projeyî de fikrîyenê. Bi no hawa ma muracatê nê projeyî kerd û muracatê ma ame qebulkerdiş. La ganî ma tay qalê pandemî zî bikerê, seba ke pandemî xeylêk serê xebata ma de tesîr kerd. Perwerdeyê tutan ma tîya dayîne, seba pandemî ma dersê xo vindarnayî. Dima ra ma waşt ke mektebêk abikerê. Tutê 2 û 5 serreyî o mektebî de ders bivînê. Seba ke tutî bi eşkê vajê no cayê ma yo. Xora amancê ma dîyar o ma nêwazenê ke tutê nê welatî bê muzîk verdê. Hem xebatê xo yê muzîkî hîra bikerê hem zî seba tutan xebatê newe bikerê."

	 

	'Ma wazenê tutî mektebî sey keyeyê xo bivînê'

	 

	Mamosteya Akademîya Ma Muzîkî Evîndar Dûlek zî dîyar kerd ke wexto ke proje ame destpêkerdene înan verê nê taslakê proje amade kerdê û Evîndare wina vatişê xo dewam kerd: "Wendekarê akademî her ke şino zêdeyêr bîne, coka êdî cayê ma qîm nêkerd. Ma zî no proje aver berd. Hem seba ke tutî rehet têbigeyrê û hem zî seba tedbîrê pandemî girîng bi. Ma wazenê wexto ke tutî ameyî no mektebî, seke keyeyê xo yê diyîn hîs bikerê."

	 

	‘Proje eleqeyêko pîl vîneno'

	 

	Evîndare dîyar kerd ke wextê proje do mengêke dewam bikero û vat: "Çiqas paştdayîş bêro dayene hende seba ma baş beno. Ma bi paştdayîş kêfweş benê. Wexto ke ma newe dest pêkerd omidê ma zêde çinbi, la wexto ke ma ewnîyenê eleqeyêko pîl esto. Komel, proje meraq keno. No zî hêz dano ma. Wexto ke ma fikrê projeyî bi tutan û keyeyê înan dir pare kerd, tutî zafkêfweş bî. Bi hetkarîyê keyeyê xo ma gêrenê û vanê, 'Mektebî do key abo' no zî seba ma zaf girîng o."

	 

	Kesê ke biwazê hetkarî bikerê eşkenê serê nê lînkî de hetkarî bikerê: http://fongogo.com/Project/ma-music-centerzarok-ma0-5-yas-ebeveyn-katilimli-muzik-egitim-merkezi