'Heta ke berê Îmralî anêbo aştî û demokrasî nîno no welatî' 

2021-02-15 09:53:10


	 

	 

	Sema Çaglak/Gulîstan Azak

	 

	
		AMED - Hemsereka Pêroyî ya DBPyî Salîha Aydenîz komployê mîyanê mîyanneteweyî ercna û wina vat: "Azadî nêzdî ya. Têkoşîno ke yeno dayene, resayo nûqtayêke. Ez bawer kena ke do bi azadî netîce bibo." Remzîye Tosuna HDPyije zî vat ke eke fikrê Ocalanî bireso şarî do şar zî bireso azadîya xo."
	
		 


	Serê komployê mîyanneteweyî ke Rayberê PKKyî Abdullah Ocalan teslîmê Tirkîya ame kerdene ser o 22 serrî derbaz bi. Abdullah Ocalan zîndanê Îmrali de 22 serrî binê tecrîdêko giran de yo. Abdullah Ocalan pêwa tecrîdo giran zî bi paradîgmayê Konfederalîzmê Demokratîk seba şaran beno omid.

	 

	Hemsereka Partîya Herêmê Demokratîk (DBP) û parlamentere HDPyî Salîha Aydenîz û parlamentera HDPyî Remzîye Tosun komplo ercna.

	 

	'Vera komplo çalakî ameye kerdene'

	 

	Salîha da zanayîş ke startê komployî 9ê teşrîna verêne 1998an de Sûrîye de ameyo dayîş û vat: "Şarê dinya hêrsêko pîl nîşanê komplo dayî. Seke roja sîya yeno vînayene. Komplo xeylêk cayê dinya de ame protestokerdene û hema zî yeno protestokerdiş. Bi komployî dir ame amanckerdiş ke têkoşînê cinîyan bêro rijnayîş. La serkewte nêbî. Komplo bi protestoyê cinîyan ame şikinayîş. Cinîyan bi perspektîfê Abdullah Ocalanî her wareyê cuye de bî veng."

	 

	'Tecrîd tesîr serê heme komelî de kerdo'

	 

	Salîha dîyar kerd ke hêzê hegomonîk yê nêwaştî demokrasî aver şêro zî polîtîkayê tecrîdî kerdî dewre û wina vat: "Abdullah Ocalan seba vernîya azadî û demokrasî bêro akerdene, perspektîf pêşnîyaz kerdo. La dewletan komplo de israr kerdê. Polîtîkayê bêdemokratîkî yê ke Kurdan rê ameyê ferzkerdene zî her cayê Tirkiye de ameyê vilakerdene û wazenê Kurdan bi polîtîkayê tecrîdî heps bikerê. Tecrîd tesîrê serê heme hetê komelî kerdo. Azadîya Abdullah Ocalanî waştişêke unîversal a. Bi têkoşîn ma eşkenê sîstemê Îmraliyî serûbin bikerê."

	 

	‘Heta ke Ocalan azad nêbo aştî zî nîna'

	 

	Remzîye zî destpêkê qiseykerdişê xo de tecrîdê serê Abdullah Ocalanî ke 22 serrî yo dewam keno ard vîr û wina vat: "Bi 22 serrî yo şarê Kurdî rê bi rastî zî xidar derbaz bi. Berê Îmralî padayî, waştî ke birêz Ocalan Îmrali de bifetesnê. La ame famkerdiş ke heta berê Îmrali nêro akerdene û birêz Ocalan bi fizikî azad nêbo aştî û demokrasî zî nîna no welatî. Gama ke birêz Ocalan azad bi do o wext azadî û aştî zî bêro. Îqtîdar çi wazeno? Wazeno ke herw ext berê Îmrali padaye bimano. Heme dinya zana heta ke berê Îmrali anêbo no îşkence, teda û zordarî hem serê şarê Tirkîya hem zî serê temamê şarê Rojhelatê Mîyanên tewr giran bo."

	 

	'Çiqas tecrîd giran beno wareyê cuya şaran z bi sînor beno'

	 

	Remzîye dîyar kerd ke nika herême de operasyonê leşkerî yenê kerdene û wina vat: "Seba tayînkerdişê qeyûmî yê Unîversîteya Bogazîçi de wendekarî vejîyayî wareyan û bi hêrişê dewlete dir rî bi rî mendî. No seba tecrîdê serê şarê Tirkîya nimûneyêko germ o. Wazenê sey şaredarîyan, qeyûm tayînê sazî û dezgehê cinîyan û sazgehê pêroyî bikerê. Çiqas tecrîd giran beno, hende wareyê cuye bi sînor beno. Tirkîya de nika krîzê ekonomî, weşî, edalet û perwerdeyî esto. Kesê ke vera nê sîstemî vejênê yenê tepiştiş. Labelê hêzê şarî û ciwanan esto û do sere nêtewênê."

	 

	'Ganî vernê de tecrîdê Îmrali bêro şikitiş'

	 

	Remzîye dîyar kerd ke vernê de tecrîdê Îmrali bêro şikitiş û vat: "Eke ke berê Îmrali abibo o wext problemê Tirkiya zî do bêrê çareserkerdene. Eke fikr û fehmê birêz Ocalanî biresê şarî, do azadî zî bêro. Coka şar tewr zêde seba wedaritişê tecrîdî têkoşîn kenê. Nika seba wedaritişê zîndanan grevê vêşanîye dewam keno. Waştişê înan tena wedaritişê tecrîdî yo. Ma zî têkoşînê xo nê esasî de bikerê."