Dayîkê Aştîye yê Sêrtî: Tecrîd dewamê komplo yo 

2021-02-14 09:18:02


	 

	 

	Rojda Aydin

	 

	SÊRT - Endamê Meclîsê Dayîkên Aştîye yê Sêrtî komployê mîyanneteweyî yê 15ê Sibate şermezar kerdî û vatî: "Tecrîd dewamê komployî yo û 15ê Sibate seba şarê ma rojêke sîya yo. La ganî bêro zanayîş ke tecrîd do bi xoverdayîşî şarî bêro wedaritene."

	 

	Reaksîyon û nêrazîbîyayîşê hemverê tecrîdê serê Rayberê PKKyî Abdullah Ocalanî dewam kenê. Grevê vêşanîye yê tepişteyan yê Wargehê Multecîyan ê Mexmûrî û yê Yunanîstanî bêmabên dewam kenê. Siba zî serrgera komployê mîyanneteweyî yê 15ê Sibate yo. Endamê Meclîsê Dayîkê Aştîye yê Sêrtî derheqê komployê mîyanneteweyî û tecrîdî de ercnayîşê xo ajansê ma rê qal kerdî.

	 

	'Hemverê temamê şarê ma tecrîdêk esto'

	 

	Wetha Kaçar, destpêkê qiseykerdişê xo de komployê mîyanneteweyî şermezar kerd û vat: "Ma tecrîdo bîyaye şermezar kenê. Dewlete destûr nêdana ke avûkat û keyeyî şêrê Îmrali. Ocalan serekê 40 mîlyonî kurdan o. Bi 22 serrî yo serekê ma Îmrali de yo. Bi zanebîyayîş tecrîd giran kenê. 15ê Sibate seba ma rojêke sîya yo. Waştişêk tena yê serek û şarê Kurdî esto û o zî aştîyêk mende yo. Ganî baş bizanê ke se kenê wa bikerê, ma do waştişê xo bîyarê ziwan. Ma weşîye ey rê zaf bi endîşeyîn ê. Heta damleyêk gonîya ma biba, ma do tîya serê rayîrê heqîqetî de bê. Hukmatê tirkî tu wext çaresî nêwazeno û coka zî tecrîd giran kenê. No tecrîd tena hemverê temamê şarê Kurdî de yeno kerdene. Tecrîdê ewro yeno manaya dewamê komplo."

	 

	‘Dewlete tu wext azadî nêwazena'

	 

	Kumrî Kaçar, qiseykerdişê xo de bale ant serê tecrîdî û vat: "Dimayê komployî tecrîd ame girankerdiş. Keyeyî nêeşkenê şêrê pêvînayîş. Êdî hêzê hukmatê Tirkîya nêmendo. Seba nê zî tena hêrişan keno. Hemverê aştî tecrîd yeno girankerde. Îqtîdar bi serran o hêrişê hemverê kurdan de xo serê lingan de verdeno. Dewlete tu wext azadî nêwazena."

	 

	'No tecrîd do bi xoverdayîşê şarî bêro wedaritene'

	 

	Maşallah Işik Arslan zî dîyar kerd ke 15ê Sibate seba nê “Roja sîya” yo û wina vat: "Na roja sîya seba ma xeylêk giran yena. Heta serek azad nêbo do na roje ma rê her wext sîya bo. Serek ewro serekê 40 mîlyonî yo. Ganî şarê Kurdî wayîrê serekê xo vejîyê. Dimayê komployî ewro Kurdistan de şerêk lêşin yeno kerdene. No bi serran o zîndan de yo û hemverê ey de tecrîd yeno kerdene. Tecrîd do bi xoverdayîşê şarê Kurdî bêro wedaritene. Sewbîna nika zîndanan de grevê vêşanîye esto û ganî waştişê tepişteyan bi ca bîyarê. Verê ke rewşe zîndanan de giran bibo, gamî bêrê eştiş. Ma do heta peynî waştişanê xo bîyarê ziwan."