'Êdî bes o ma azadîya tepişteyan wazenê'

2021-02-13 09:15:20


	 

	 

	Medya Uren

	 

	MÊRDÎN - Tepişteya bi nameyê Cîhan Zamûr, derheqê grevan de vengdayîşê hîsgêrî kerd û vat: "Ewro do bêvengî bibo, sebebê merdişan.Ewro dem demê azadî yo." Dayîka aye Heva zî waştişê azadîya tepişteyan kerd û wina vat: "Cîhane 150 serrî, pîyê aye zî di rey 20 serrî ceza ci rê ame birnayene. Cuya mi verê berê zîndanan de derbaz bi. Ez vana êdî bêheqî û tecrîdî rê bes o. Ma azadî wazenê."

	 

	Çalakîya Grevê vêşanîye hemverê tecrîdê serê Rayberê PKKyî Abdullah Ocalan û hemverê binpaykerdişê heqan yê zîndanan ke 27ê Teşrîna Peyêne 2020 de zîndanê Tirkîya û herême de ameyê destpêkerdene de roja xo ya 79 de dewam keno. Çalakgera grevê vêşanîye de ya Cîhan Zamûra ke 150 serrî ceza ci rê ameya birnayene zî vera tecrîd û binpaykerdişê heqan de vengdayîşê xurtkerdişê çalakîyan kena. Ma nika cuya keyeyê Cîhane bimusê û bibê şahidê têkoşînê aye.

	 

	Cîhan Zamûr serra 1984 de mîyanê keyeyê welatperwer de Qoserê Mêrdînî de yena dinya. Cîhane hema tute bena, pîyê aye yeno tepiştiş û 20 serran zîndan de maneno. Pîyê aye îşkenceyê ke vîneno ra destê xo vinî keno. Cîhane zî demrê xo yê 18 serrî de vera tehdîdan û zulmî sere wedarnena û tewrê têkoşînê azadîye bena. Dimayê 8 serran netîceyê operesyonêk ê leşkerî de birîndarî yena tepiştiş. Dimayê ke yena tepiştiş surgunê xeylêk zîndanan yê sey Bitlîs, Îzmîr, Şirnex û Baybûrtî yena kerdene. Tewr peyîn zî surgunê zîndanê Şakranê Îzmîrî yena kerdene.

	 

	'Dem demê azadî yo'

	 

	Cîhane bi rayîrê telefonî dayîka xo Heva Zamûr dir qisey kena û wina vana: "Grevê vêşanîye hemverê pêro bêheqîyan yeno kerdene de protestoyêko. Lazim o her het ra seba çalakîye paştdayîş bêro dayene. Dem demê azadîye yo. lazim o ma êdî wirzê serê linganê xo. Ewro do bêvengî bibo sebebê merdişan. Lazim o ti û pêro dayîkê tepişteyan tewrê çalakîyan bibê."

	 

	'Vizêr mêrdeyê mi ewro kênaya mi yena îşkencekerdene’

	 

	Dayîke Cîhane, Heva vat ke 40 serrî yo vera îşkenceyan cuya xo dewam kenê û vat: "Ma mîyanê îşkenceyê dewlete de ciwîyenê. Bi her hawa ma mîyanê tecrîdî de yê. Nasnameyê ma sîya kenê. Ma pêro heqê merdimayî ra mehrûm kenê. Bi taybetî zî zîndanî bîyê awanîyê îşkence. Sere de mêrdeyê mi rastê nê bêheqîyan ame. 20 serrî tepişte mend û seba îşkence, destê ey felç bi. Çend serrî verê ci rê 21 serrî ceza ameye dayene û ey zî mecbûrî verê xo da teberê welatî. Nika zî kênaya mi bi eynî îşkence dir rî bi rî ya."

	 

	'Ma azadî wazenê'

	 

	Heva vana ke cuya ma rayîrê zîndanan de derbaz bî û vat: "Mêrdeyê mi emrê ci 70 bi, ma pey ey de bî û nika zî ez pey kênaya xo da. Nika emrê kênaya mi zîndan de derbaz bena. No bi sereyê xo bêwijdanî yo. Ez seba pêro tepişteyan seba nasnameyê şarê Kurdî azadî wazena. Heqê înan yê ciwîyayîşî esto. Ma îşkence û tecrîdê serê înan qebul nêkenê. Heta peynî zî vera nê tecrîdî, ma do tutanê xo dir têkoşîn bikerê êdî bes o."