Qelema tutan ra seba Abdullah Ocalanî mektubî 2021-02-12 09:31:50   AMED - Dimayê komployê mîyanneteweyî yê hemverê Rayberê PKKyî Abdullah Ocalanî bi desan tutanê Kurdan mektube nuşt. Mektuban da hîs, hesret û sozê ke tutan dayo Abdullah Ocalan ca gêno.   Serê komployê mîyanneteweyî yê Rayberê PKKyî Abdullah Ocalan ardî Tirkîya de 22 serrî derbaz bi. 15ê Sibata 1999 ra heta nika reaksîyonê vera komployî dewam kenê.   O wext de çîyê ke hişan de mendê mektubê ke tutan seba Abdullah Ocalanî nuşto yê. o. Tirkîya, Vakur û Rojhelatê Sûrîye, Mexmur, Rûsya, Yunanîstan û xeylêk cayê dinya tutê Kurdî hîsê xo bi mektuban ardibî ziwan.   Mektubî bî kitab   Mektubê serra 1999-2000î de ameyî nuştiş, hetê weşanê Mem ra sey kitab ameyî çapkerdiş. Kitab bi nameyê, ‘Birêz serekê ma ema xeylêk to ra hes kenê' vejîya. Kapaxê kitabî de fotografê Abdullah Ocalan û fotografê tutêk 3-4 verê Ocalanî esto. Kitab tena reyke û bi sînor ame çapkerdene. tutî mektuban de heskerdiş, hesretê xo yê hemverê Abdullah Ocalanî anê ziwan.   Tutî dîyar kenê ke seba aştî têkoşîn kenê û seba azadî çi destê înan ra bêro do bikerê û seba Ocalanî vatî, ‘Ma wazenê to Amed de bivînê.'   4 serre mektube nuşt   Mehmet Kirik ke nika zîndanê Tîpê D yê Amedî de tepişte yo, nê tutan ra yo. Keye Mehmetî ra vano Hebûn. Hebûn o wext 4 serre bîyo. 21ê Çeleyî 2000î de mektube nuşto.   Hîn mektubê ke kitab de yê wina yê:   'Fikrê to bi sey Çemê Firatî’   “Birêz Rayberê mi, Roşanê To yê Remezanî pîroz bo. Ti serekê bindestanê. Ti pirda mabêne merdiman ê. Ti sey Çemê Firatî yê. Ma tutê Kurdî zî do awa ci bişimnê û biresê azadî. Ez 10 serrî ya. Nameyê mi Newroze ya. Şina mektebê sereyîn û Wan ra ya.   *Birêz serekê mi…   Mi qelema xo girewt û nuşt. Serekê min o bi rûmet. Heskerdiş û hurmet. Zinarîn- Lavrîon- Yewnanîstan.   *Birêz serekê mi…   Ma tutê to yê. Ma her wext girêdayeyê to yê. Ez Amed Bîlgîn 11 serrî ya. Almanya   *Birêz Ocalan   15 serrî ya. Ez zanistê komelî ra hes kena. Ti seba cuyêka bi rumet tepiştê. To ramojna ke ti eşkenê zîndan de se bikerê. Ez rêzdariyê xo şawena. Serdar-Edene   *Birêz Ocalan   Ez Enqere de ameya dinya û pîl bîya. Nameyê mi Firat o. Şina sinifa yewin. Ez zerrîya xo ra to rê kevoke şawena. Omid kena ke ti zî zerrîya mi ra hes bikerê û weşîkîyê zerreyê ci de biecibnê. Ez wazena biba wendekarê to. Ma zaf vîrîye to kerd. Firat Arslan-Enqere   *Merhaba…   Merhaba Abdullah Ocalan. Ez 15 serrî ya. Ez kênayêka qije wazena seba to her çî bikera. Bi omidê ke waştişê ma bi ca bêrê şan weş. Şehrîban Sal-Stenbol   *Canê mi serekê mi   Ez zaf to ra hes kena. Ez nêwazena ti tepişte bimanê. Ez wazena ti bêrê Sêrt, ez to bivînî. Ez zî wazena agêrî dewa xo. Ez 10 serrî ya. Destê to maç kena, heskerdişê xo to rê şawena. Evîn Kortum-Sêrt.   *Seba roja şorişî   Selam roja şorişî Abdullah Ocalan. Ez hesreta xo nê kaxidî rê nusena. Lekeyê serî hêsrê çimanê min ê. Mi pak kerd. Ez soz dana. Dima ra mi kerd zarf ke ti bivînê. Ez 15 serrî ya, behrê sîya ra ya. Ez tay xişna, sey to nêbo zî hîn weşik a. Can Saçik-Stenbol.   *Kevoke Aştîye Abdullah Ocalan   Ez wazena serekê mi bêro veradayene. Ez vana wa fotografê serekê mi her ca de bidaliqnê. Ez xo rê wesayîtêk îtfaye viraznena, yena zîndan. Ez o to bigîra bera komele, berî koyan.   *Birêz Serekê mi ez zaf to ra hes kena. Vîrîye to kena. Her şewe vana şew baş. Ti hetê aştîye yê. Heta peynî ez kîşte to de ya. Ez tena bi vatişê to ra bawer a. Aykut.   *Ti Serek Apo   Ti merdimêko baş ê. Meraq meke ez to xelas bikera. Bi omidê ke ma biresê yewbînan. Love From. Ajwan, Berzan, Berna. London.   *Birêz serekê ma, rumetê ma. Ma xeylêk to ra hes kenê. Ez kurd a. Hemverê daliqnayîşî ya. Ez aştî wazena. 14 serrî ya. Serra to ya newe pîroz kena. Diyar Yilmaz-Mêrdîn.   *Birêz serekê mi   Ez bi rêzdarî sere tewênena. Werrekna na dinya to fam bikerdêne. Wina bibayîne do zulm û nêheqî peynî bibayîne. Wan.   *Birêz serekê mi   Mi zaf bêrîya to kerd. Wexto ke to televîzyon de vînena, kêfweş bena. Ez zaf to ra hes kena. Selam û Rêz. 11 serrî ya. Hazal Bakan-Wan.   Sewbîna fotografê ke tutan xêz kerdê zî ca gênê.