Dayîkî: Ganî veng bidê vengê tepişteyan

2021-02-11 09:26:37


	 

	MUŞ - Bi amancê wedaritişê tecrîdê serê Raberê PKKyî Abdullah Ocalan û peynîbîyayîşê binpaykerdişê heqan ê zîndanan de grevê vêşanîye amebi destpêkerdene. Keyeyê tepişteyanê bi nameyê Bîlal Babahanli û Ferhat Ozer ke ê zî grev de yê, veng dayî ke ganî veng bidê vengê tepişteyan.

	 

	Bi amancê wedaritişê tecrîdê serê Rayberê PKKyî Abdullah Ocalan û peynîkerdişê binpaykerdişê heqan ê zîndanan 27ê Teşrîna Peyêne de grevê vêşanîye bêdem û bidor ame destpêkerdene. Bêvengîya selahîyetdaran zî rastê reaksîyonê pîlî yeno. Gule Babahanli û Ayşe Ozera ke Gimgimê Muşî de ciwîyenê, dîyar kerdî ke tutê înan nika grev de yê û vatî, ganî vengê tepişteyan bêro eşnawitiş.

	 

	'Ame surgunkerdiş'

	 

	Gule vat ke lajê aye Bîlal Babahanli zîndanê Tîpê L yê Panosî de yo û Stenbol de ameyo destbendkerdiş û ardê Muş û vat: "Lajê mi Muş de dimayê îfade ame tepiştene. Sebebê tepiştişî, qiseykerdişê telefonî yo. Bîlal 7 serrî yo tepişte yo. 25 rojan Muş de mend û dima ra ardî Panos. Hîrê tutê lajê mi estê. Cinîya ey nêweş a. Şî Stenbol seba ke derman biba. 47 serrî ceza dayî lajê mi. Îdareyê zîndanî teda tepişteyan rê keno. Ma dekewtişê zîndanî de teda vînenê. Lajê mi ame surgunkerdene û seba nê ma hetê ekonomî de probleman ciwîyenê. Dima ra şi Panos, ma nêeşkenê şêrê."

	 

	'Ez do cam ra senîn boya lajê xo biancî'

	 

	Gule wina dewam kerd: "Seba vîrusî pêvînayîşê girewte yê. Seba nê ma zêde nêşinê. Wexto ke nêweşî çin bî, ma menga ra di rey şîne pêvînayîş. Nika seba pandemî nêefterana şêrî. Ez şêrî zî cam esto mabêne de. Ez o wina lajê xo boye bikera. Lajê mi nika grev de yo. Ez sey dayîkêke wazena ke grev peynî bê. Ganî waştişê tutanê ma bi lez bi ca bêrê."

	 

	'Ma rastê caardişan yenê'

	 

	Dayîka tepişteyê bi nameyê Ferhat Ozer ke zîndanê Wanî de yo, Ayşe Ozer zî vat lajê aye 5 serrî yo bi îdiayê endamê rêxistene ameyo tepiştiş û vat: "Lajê mi zî grev de yo. Wexto ke lajê mi ame tepiştiş, îşkence bi ci kerdî. Nika seba tecrîd û binpaykerdişan kewtî grev. Hemverê keyeyan zî binpaykerdiş esto."

	 

	Waya Ferhat Ozerî, Zerda Ozer zî vat, bi îdiayê ‘îdarekarê rêxistine’ cezaya muebetî Ferhat Ozerî rê ameya birnayene û avûkatan dosya berda dadgeha herême û vat, dosya xera bîya la hema muhakemekerdiş dewam keno. Zerda dîyar kerd ke pêwa delîlêk çin o zî 5 serrî yo birayê aye tepişte yo û vat: "Ma şinê pêvînayîşan û yenê ma xeylêk kewenê zehmetî. Keyeyî heta şinê û yenê acis benê. Caardişê kêfî estê. Zîndanan de tedayî zêde bîyê. Binpaykerdişê heqan zêde bîyê. Nika birayê mi zî grev de yo. Ganî ma vera grevê tepişteyan bêveng nêmanê. Ganî seba nê dejî peynî bê, ganî gamî bêrê eştene."