'Zîndan de nêweşîya Kadrîye tewr giran bî'

2021-02-10 09:11:04


	 

	Rojda Aydin

	 

	SÊRT - Dayîk û kênaya tepişteya nêweşe Kadrîye Cengîz rewşa aye ya weşîye ra bi endîşeyîn ê û vengdayîşê hîsgêrî kenê. Dayîka aye Gulsume, dîyar kerd ke ganî Kadrîye teber de bêra tedawîkerdene û seba nê zî ganî serbest bêra veradayene. Kênaya aye Evîne zî vat ke pêwa doktorî vanê nêeşkena zîndan de bimana zî nîna veradayîş.

	 

	Kadrîye Cengiz 45 serrî ya û Zîndanê Tîpê Myê Êlihî de tepişte ya. Derheqê aye de bi sebebê "Endama Rêxistine" ya 9 serrî û 6 mengî ceza amebî birnayene. Kadrîye 6 serrî yo tepişte ya. Kadrîye ke hema nêkewtibî zîndan, nêweşîyê aye bî. Seba şert û mercê zîndanî tewr zêde rewşa aye weşîye giran bî. Kadrîye ke nêweşa kanserî ya pişike ya di rey mîdeyê aye gonî bi û di rey zî krîzê qelbî derbaz kerd. Dayîk û kênaya Kadrîye ajansê ma rê qalê rewşa aye kerdî û waştişê serbestveradayîşê aye kerdî.

	 

	'Zîndan de tedawîya aye nîna kerdene'

	 

	Dayîka Kadrîye, Gulsum Cengîz, dîyar kerd ke nêzdîyê serrêke Zîndanê Tîpê Eyê Sêrtî de menda û dima ra surgunê Zîndanê Tîpê Myê Êlihî kerdî. Gulsume wina vat: "Kênaya mi mîyanê xebatê sîyasî de ca girewt û ameye tepiştene. Kadrîye 6 serrî yo tepişte ya û 3 mengî yo Êlih de ya. Rewşa weşîye aye nika baş nîya û her roje hîna giran bena. Ganî serbest bêra veradayene û tedawî bivîna. Aye zîndan de nêeşkena bêra tedawîkerdene. Kadrîye verê ke bêro tepiştene zî nêweş bîye. Bi nêzdîyê 6-7 serrî yo nêweş a. La dimayê ke ameye tepiştene, nêweşîya aye tewr giran bî."

	 

	'Ganî waştişê tepişteyan bêrê qebulkerdene'

	 

	Gulsume tewr peyîn vengdayîşê hîsgêrî kerd û vat: "Nika zîndanan de grevê vêşanîye estê. Tena waştişêk înan esto, o zî peynîkerdişê tecrîd û binpaykerdişê heqê tepişteyan o. Ganî waştişê tepişteyan bêrê qebûlkerdene. Nê grevê vêşanîye xeylêk tesîr serê weşîye tepişteyan de keno. Bi taybetî zî tepişteyê nêweşî. Ganî hukmat verê ke erey game bierzo. Vengdayîşê ma hukmatî ra oyo ke wa tepişteyê nêweşan serbest vera bidê."

	 

	'Zîndan de nêweşîya aye tewr giran bî'

	 

	Kênaya Kadrîye, Evîne Cengîz zî dîyar kerd ke dayîka aye mergî dir rî bi rî ya û vat: "Dayîka mi bi 6 serrî yo tepişte ya. Zîndanê Sêrtî ra surgunê zîndanê Êlihî ameye kerdene. Prosesê nêweşî de xeylêk nêweşîyê dayîka mi virazyayî. Nêweşîya kanserî ya pişike peyda bî. Sewbîna çimanê xo ra zî nêweş a. Sewbîna di rey krîzê qelbî derbaz kerd. Ganî seba nêweşîya aye, nika bi şertê kontrolê edlî biameyîne veradayene. Labelê aye hema zî vera nêdanê. Seba nêweşîya aye her wextbenê nêweşxane û seba şubeyê vîrusî zî tim kenê qarantîna û hucreya yew kesî."

	 

	'Çira tepişteyê sîyasî nînê veradayîş?'

	 

	Evîne, waştişê edalet û huqûqî kerd û vat: "Ma tena edalet wazenê. Rewşa xeylêk tepişteyê nêweşan tehluke de ya. Seba şubeyê vîrusî xeylêk tepişteyê sey tecawuzkar, dizd û xeylêk kesê bîn ameyî veradayîş. Çira tepişteyê sîyasî nînê veradayîş? Ma wazenê ke ganî bêrê veradayîş. Eke têduştî esta, wa pêro tepişteyan rê eynî bo. Wa selahîyetdarî gamê lazim bierzê. Wa dayîka mi û pêro tepişteyê nêweşî bêrê veradayîş."