Gumanbaro ke Pelda qetil kerd, sucê desteştişî ra ameyo beratkerdene 

2021-02-08 09:41:29


	 

	Şehrîban Aslan

	 

	AMED - Ame dîyarkerdene ke gumanbar Huseyîn Oruço ke Pelda Karaduman qetil kerdo, sucê desteştişî ra berat kerdo. Avûkate Merva Demîrcan dîyar kerd ke Merkezê Tutan ê Baroyê Amedî îtîrazê nê qerraî kerda.

	 

	Amed de Huseyîn Oruç, bi hetkarîya merdimê xo Şahîn Oruçî, Pelda Karaduman, remnabi. Pelda rê tecawuz amebi kerdene û bi marayê dînî amebî zewicnayîş. 6 serran zî Huseyîn Oruç tecawuzê Pelda kerd û şîdet ci rê kerdibi. Pelda tewr peyîn 2017 de hetê Huseyîn Oruç ra ameye qetilkerdene. Hîrê serrî dima dewa ameye akerdene. Huseyîn Oruç 7ine Dadgeha Cezaya Giran ya Amedî de ame muhakemekerdene û ne sucê, ‘qestî cinî kiştiş', sucê ‘qestî kes kiştiş’ ceza ci rê ame birnayîş. Sewbîna dadgehe gumanbarî bi ‘vistişê tehrîqê nêheq’ xelat kerd û ceza vist 18 serran. Avûkatê keyeyê Pelda îtîraz ceza rê kerdî û dosya berdî îstînaf. 4in roniştişê dewa ame vînayene.

	 

	Avûkata merkezê Heqê Cinîyan ê Baroyê Amedî Merva Demîrcan ke avûkata dewa ya, derheqê dewa de qisey kerd.

	 

	'Ma waştiş kerd ke cayê hedîse kifş bêro kerdene'

	 

	Merva wina vat: "Keyeyî dimayê îstînafî muracatê Merkezê Heqê Cinîyan ê Baroyê Amedî kerd. Muhakeme zaf xirab ameyo kerdene. Ca nêameyo kifşkerdene. Delîlê ke kewtê dosya zaf zelal nêyê. Roniştişê diyîn de ma sey merkez tewr bî. Ma hewl danê ke kêmîyan çareser bikerê. Ma waştişê kifşkerdişî kerd û dadgehe zî zana ke ganî kifşkerdiş bêro kerdene. La dadgehe qerar da ke ganî emnîyet kifş bikero. CD yê derheqê cigêrayîşê cayê hedîse werte de çin o. No CD seba dewa zaf girîng o. Seba ke di gumanbar estê û îfadeyê înan seyyewbînan nêyê. Dadgehe zî nê nakokîyê îfadeyan de ferq kerd, no het ra pers kerdî."

	 

	'Ganî Şahîn Oruç zî bêro cezakerdene'

	 

	Merva wina dewam kerd: "Marayê fermî yê gumanbar Huseyîn û Peldayî çin o. Gama ke marayê fermî çinbo, qanûn de zî sey ‘qestî cinî kiştiş' nêno ercnayîş. Sewbîna ma ewnîyenê gumanbaro bîn Şahîn Oruç zî pêro hedîseyan de kîşte Huseyîn Oruçî de yo. O zî gumanbaro hemkar o. Dadgeha nê qebûl neêkena zî goreyê ma ganî bêro cezakerdene.”

	 

	Merva tewr peyîn wina vat: "Pelda 13 serrîya xo de digane menda. No resayo merciyê edlî û dewaya îstîmlakî ameya akerdene. Îfadeyê Pelda yê emnîyet û dadgehe de vuryenê. Wexto ke ma nê ra biewnê, yeno vînayene ke Pelda binê ters û tehdîdî de ya. Pêwa raporê sazgehê tipê edlî de diganebîyayîşê Pelda ca gêno zî hetê dadgehe ra cezayêk nêameyo dayene. Gumanbar Huseyîn Oruç vato ke ê nêzanayo 13 serrî ya, vato qey 18 serrî ya. Dadgehe vato ke waştişê Pelda bîyo û seba nê zî ceza nîna dayene û qerarê beratî danê. Gelo waştişê tutêke 13 serrî senîn beno? Gumanbar merdimê Pelda yo, la senî beno vano ke 18 serrî pîlêr a? Merkezê Tutan ê Baroyê Amedî bi dosya dir nêzdî ra eleqeder beno."