'Tecrîd sewîyeyê tewr corî yê îşkence yo'

2021-02-07 09:17:05


	 

	Medya Uren

	 

	MÊRDÎN - Hemsereka HDPyî ya Dêrsimî Nurşat Yeşîl, dîyar kerd ke 23 serrî yo hemverê Rayberê PKKyî Abdullah Ocalan tecrîdêk esto û vat: "Tecrîd sewîyeyê tewr corî yê îşkenceyî yo û sucê merdimayî yo. Zîndan de nika vera tecrîd û binpaykerdişê heqê tepişteyan çalakîyêke esta. Berpirsîyarê ma zî wayîrvejîyayîşê grevî yo."

	 

	23 serrî hemverê Rayberê PKKyî Abdullah Ocalanî tecrîdêk girankerde esto. Hemverê tecrîdî û binpaykerdişê heqê tepişteyan, zîndanê Tirkîya û herême de tepişteyî 27ê Teşrîna Peyêne 2020 de dest bi grevê vêşanîye kerdî. Grev, bi koma 15ine de roja 73ine de dewam keno. Tepişteyî bi rayîrê keye û avûkatanê xo bale antî serê xesasîyetî prosesî û vengdayîşê hîsgêrî kenê. Derheqê tecrîd û grevê vêşanîye de Hemsereka Partîya Demokratîke ya Şaran (HDP) ya Dêrsimî Nurşate Yeşîl ajansê ma rê qisey kerd.

	 

	'Tecrîd sucê merdimayî yo'

	 

	Nurşate dîyar kerd ke hemverê Rayberê PKKyî Abdullah Ocalan tecrîdêko girankerde esto û vat: "23 serrî yo tecrîd serê birêz Abdullah Ocalan dewam û serrê peyîn de zî no tecrîd ame girankerdiş. Bi tecrîd dir komel, keye û teberî de yenê îzolekerdene. Her wina heqê xo ra yenê mehrûmkerdene. No sewîyeyêk tewr corî îşkenceyî yo. Serê kamî de bêrokerdiş sucê merdimayî yo. La demê serê rayberêk yeno kerdene, no çi yeno manaya tecrîdê hemverê şarî zî. Yan zî heqê bi milyonan yeno binpaykerdiş. Bifikirîyê bi serran o bi tu hawayî hetê weşîye, başîye Abdullah Ocalanî de xebere nîna girewtiş."

	 

	'Ganî pêvînayîş reyke bîn bêro kerdene'

	 

	Nurşate dewam de wina vat: "Bi serran o şerêk herême de dewam keno. Tecrîd û şer girêdayê yewbînan ê. Seba ke şer esto, problemê demokrasî, ciwîyayîş û ekonomî zî esto. Nê problemî nê welatî yê. Seba nê problemî werte ra wedarnê, şer bêro vindernayîş. Seba şer vindaro zî ganî tecrîd werte ra wedarnê. Sewbîna seba averşîyayîşê demokrasî ganî pêvînayîş Îmrali reyke bêro destpêkerdene."

	 

	'Heqê tepişteyan yeno binpaykerdiş'

	 

	Nurşade dewam de vat ke zîndanan de binpaykerdişê heqan dewam keno û vat: "Cigêrayîşê viran, nêdayîşê lazimîyê rojane, astengkerdişê pêvînayîşan problemêko pîl o. Tepişteyî mîyanê tecrîdî de tecrîdî ciwîyenê. Tepişteyî ke nêweşîya înan ê kronîk estê, tepişteyê ke emrê pîl yê estê û tepişteyê emrê qij estê. Şert û mercê nika de nêeşkenê biciwîyê. Hemverê binpaykerdişê heqan nika verê xo danê û grevê xo yê vêşanîye dewam kenê. No rayîr, rayîrêko tewr peyîn o. Welatêko ke dad û demokrasî çin bo, ma do nê çîyan biciwîyê."

	 

	'Ma do têkoşînê xo pîl bikerê'

	 

	Nurşade tewr peyîn wina vat: "Seba waştişê demokrasî nika zîndanan xoverdayîşêk esto. Nika zî dorê ma yo. Lazim o ma beşdarê çalakîyê înan bê û bibê vengê tepişteyan. Nika xeylêk çalakîyê ma yenê astengkerdene û hêrişê ma kenê. La ma vera her tewir hêrişan xo ver danê û qet game peyser nêerzenê. Partîya ma do biba vengê tepişteyan. Ma do her wareyî de çalakîyê xo bikerê. Ma do têkoşînê xo pîl bikerê."