'Ma do wayîrê grevê vêşanîye vejîyê' 

2021-02-06 09:15:35


	 

	 

	Sema Çaglak - Safiye Alagaş

	 

	AMED - Nerîman Aydin qiseykerdişê xo de bal ant serê rewşa lajê xo Welat Aydino tepişte û vat: "Lajê mi wexto ke telefon akeno, vengdayîşê ayabîyayîşî keno. Ganî ma zî goş bidê waştişanê înan û wayîrê çalakîyê tepişteyan vejîyê."

	 

	27ê Teşrîna Peyêne 2020 de tepişteyê sîyasî zîndanê Tirkîya û herême de tecrîdê serê Rayberê PKKyî Abdullah Ocalan û seba şermezarkerdişê binpaykerdişê heqanê tepişteyan dest bi grevê vêşanîye yê bêdem û bidor kerdî. Seba waştişê tepişteyan bêrê qebulkerdiş, sere de keyeyê tepişteyan, sazgeh û dezgehê sivîlî vengdayîşê hîsgêrî kenê. Welat Aydin, 3 serrî yo Zîndanê Tîpê D yê Amedî de tepişteye yo. Dayîka Welatî, Nerîman Aydin ajansê ma rê qisey kerd û bale ant serê rewşa tepişteyan.

	 

	'Hemverê ma tecrîd esto'

	 

	Nerîmane dîyar kerd ke ganî girîngîyê çalakîya grevê vêşanîye baş bêro famkerdiş û vat: "Lajê mi verê zî tewrê grevê vêşanîye bibi. O wext zî seba wedaritişê tecrîdî bi. Nika zî bi eynî waştiş, grev de yê. Tepişteyî waştişê xo de bi israr ê û heta ê waştişê înan nêrê qebulkerdiş, do her wext mîyanê çalakîyan de bê. Xora bi serran o, vera ma tecrîdêk esto. Ma şêrê ça polîsî serê ma de teda kenê. Heta ke birêz Ocalan azad nêbo ma zî nêeşkenê azad bibê. Ganî kurdî nê çî baş fam bikerê û goreyê nê çalakîya grevê vêşanîye rê nêzdî bibê."

	 

	'Fikr û bîyayîşê Abdullah Ocalanî ra tersenê'

	 

	Nerîmane vat ke fikr û bîyayîşê Abdullah Ocalanî ra tersenê û wina dewam kerd: "No tecrîd ke bi serran o bi hawayêko girankerde yeno kerdene, tesîrê xo her ke şino zêde keno. Wa kurdî xo nêxapênê û nê vajê vera ma tecrîd çin o. Ma her ware de rastê tedayî yenê, no tecrîd o. Teber de panzer û polîs, zîndanan de binpaykerdişê heqan, parçeyê bîn zî bi îşxalkerdiş, pêrodayîş û daliqnayîş esto. Ganî şarê Kurdî vera hêriş û tedayan yewîya xo awan bikerê."

	 

	'Bi bêvengî û tersî no zulm nêqedêno'

	 

	Nerîmane dewam de wina vat: "Çalakîya ke zîndanan de ameya destpêkerdene di mengî ra zêdeyêr o dewam de ya. Lajê mi telefon de vano, 'Tecrîdê serê ma her ke şino hîna zêde beno. Înfazê ma yeno veşnayîş. Tepişteyê ke bêrê tehlîyekerdiş, nînê tehlîyekerdiş. Cezaya înan zêde kenê.' Ma rewşa tepişteyanê xo ra endîşeyîn ê. Îqtîdar vera grevê vêşanîye kerr û kor o. Na rewşêka şermezarkerdişî ya. Zulmo ke nika ma rê kenê, şibîyeno zulmmê serranê 90an."

	 

	‘CPT hemkarê nê zulmî yo'

	 

	Nerîmane bale ant serê helwestê CPT zî û vat: "Seba ke CPT û dewletê netewî nê tecrîdî rê bêveng manenê, Tirkîya tecrîd giran kena. CPT tecrîdê Îmralî de bi helwestê xo paweno. Coka tena kurdî bi xo eşkenê tecrîd wedarnê û vengêko hempar nê zulmî ra vajê êdî bes o. Ma çiqas erey bimanê zî hende zirar o."