'Gelo gumanbar seba leşkerê dewlete yo yeno pawitiş?' 

2021-02-04 09:55:51


	 

	 

	COLEMÊRG - Bajarokê Buyukçiftlîkî yê qezaya Geverî ya Colemêrgî de cinîya bi nameyê Surmî Înce bi guleyê hetê leşkeran ra ame eştene, ameye qetilkerdene. Veyva aye Asya Înce dîyar kerd ke dewa 5 serrî yo dewam kena û vat, ganî gumanbarî ceza bigirî û wina vat: "Gelo gumanbar seba ke leşkerê dewlete yo, yeno pawitiş?"

	 

	Bajarokê Buyukçiftlîkî yê qezaya Geverî ya Colemêrgî 18ê Temmuza 2016 de cina bi nameyê Surmî Înce ya 55 serrî ke werd berdêne tutanê xo yê ke vaş çînenê, hetê leşkeran ra amebî qetilkerdene. Çawîşo pispor Alî Dagkiran ke qetilkerdişê Surmîye ra berpirsîyar bi, hîrê û nîm zîndan de mend û dima ra serbest ame veradayene. Veyva aye Asya Înce ke roja hedîse verê Surmîye bî, dîyar kerd ke ganî dewa bi netîce bo û berpirsîyarî cezayê xo biancê û vat, dewlete leşker û polîsanê xo pawena.

	 

	'Seke ma bikişê ameyîne'

	 

	Asya dîyar kerd ke Surmîye seba tutanê xo yê ke vaş çînayîne werd berdêne û vat: "Cayo ke vaş ameyîne çînayîş, qerekole ameyîne vînayene. Ma arayî kerdêne, qerekole ra di wesayît ameyî. Senîn kewtî qerekole wina vejîyayî û ameyî dewe. Dayîka Surmîye vat, 'gelo nê seba belayêke yenê.' Dima ra ma arayî wedara. Ma amadekarîya xo kerd û ma agêrayîne dewe. O wext wesayîtî ameyî, ma temaşe kerdêne. Wesayîtî wina bi lez ameyîne, ma vatêne qey seba kiştişê ma yenê. Xora seba kiştişê ma ameyîbî. Dima ra vindertî mabêne ma de 20-25 metre estbi."

	 

	'Guleyî heta verê ma ameyî'

	 

	Asya dîyar kerd ke leşkerî wesayîtan ra vejîyayê û vatê, her kes wareyî terk bikero, la seba terkkerdişî zî destûr nêdayê û vat: "Gule eştî. Ma xo eşt erd. Her kes qîrayîne. Heta verê sereyê ma zî gule kewtî. Mi vat qey her kes merd. Gule vindertî. Mi veng da dayîka Surmîye. Ma wedarna, ma dî ke şîya rehm. Ûca de zî vernîya ma girewtêne, ma hetkarî waştêne, la hetkarî nêdayî ma. Serê ma de qîrayîne. Vatêne, 'tîya ra vejîyê, şima tîya se kenê.' Nengan çînayîne. Nêverdayî ma cenazeya xo wedarnê. Ma hewl da ke cenaze bi wesayît berê, la wesayîtê leşkerî rayîr girewt. Nêverdayî ma berê nêweşxane. Xora senîn gule ginabi piro, şîbî rehm."

	 

	'Ma wazenê gumanbar bêro cezakerdene'

	 

	Asya dîyar kerd ke pisporo çawîş ke amebi tepiştiş, ameyo veradayene û reyna dest bi wezîfeyê xo kerdo û wina vat: "Ma pêro zanê ke dayîka Surmîye kişto. Ma edalet wazenê. Dewlete leşkerê xo pawena. Ma êdî nêwazenê şêrê dadgehan. Ma wazenê bi netîce bo. Ma wazenê kiştox bêro cezakerdene."