
Dayîkê tepişteyan: Seba tepişteyan vejîyê wareyan  

2021-02-04 09:54:10


	&nbsp;

	&nbsp;

	Safiye Alagaş - Sema Çaglak

	&nbsp;

	AMED - Paştdayîşê seba çalakîya grevê vêşanîye her ke şino zêde beno. Keyeyê tepişteyan veng dayî ke wa heme kesî vejîyê wareyan û vatî: "Ma pey waştişê tutanê xo yê û heta peynî ma do têkoşîn bikerê."

	&nbsp;

	Tepişteyê PKKyî û PAJKî, 27ê teşrîna peyêne 2020 de bi amancê peynîkerdişê tecrîdê serê Rayberê PKKyî Abdullah Ocalan ke 21 serrî yo Zîndanê Îmralî de Asayîşê Berzî yê Tîpê F yenê tepiştiş û şermezarkerdişê binpaykerdişê heqê tepişteyan zêdebîyê, dest bi çalakîya grevê vêşanîye kerdî. Hemverê grevî keyeyî vengdayîşê paştdayîşî kenê. Şukran Akboga û Erzîhan Ozer ajansê ma rê qalê rewşa tepişteyan kerdî.

	&nbsp;

	'Binpaykerdişê heqan hîna zêde bîyo'

	&nbsp;

	Şiyar Akboga Zîndanê 2yîn ê Tîpê T yê Bandirmayî de yo. Dayîka ey Şukran Akboga, dîyar kerd ke 12 serrî yo Şîyar tepişte yo û vat: "Verê ke lajê mi bêro tepiştiş, polîsan eşt serê keyeyê ma û ti kes keye de çinbi. Keyeyê ma tarûmar kerdibî. Cîranê ma zanayîş dabî ma. Di tutê mi bînî zî Şîyarî dir ameyî destbendekerdene. Dimayê îfadeyê her di bînan serbest ameyî veradayîş la Şîyarî tepiştî. 25 serrî ceza dayî Şîyar."

	&nbsp;

	'Ma pey waştişê tutanê xo yê'

	&nbsp;

	Şukrane dîyar kerd ke lajê aye telefon de vengdayîşê wayîrvejîyayîşê çalakî kerdo û vat: "Lajê mi gama ke telefon keno, qalê zulm û tehdayê serê înan keno û her wext wina vano 'heta ke serekê ma azad nêbo, ma zî nêeşkenê azad biciwîyê. Wa şarê ma zî nê çî bizano. bi no hawa nêzdîyê çalakîya ma bibê.' Ma zî pey waştişê tutanê xo yê. Heta ke dilopêke gonî canê ma de bimano, ma do xo ver bidê û têkoşîn bikerê."

	&nbsp;

	'Ma aştî de ê zî şer de bi israr ê'

	&nbsp;

	Şukrane qiseykerdişê xo wina qedêna: "Wa êdî no tecrîd wirzo, ma êdî nêwazen tutê ma bikewê grev. Ma dayîk ê, ma aştî wazenê. La ma çiqas aştî de bi israr ê, ê zî hende şer de bi israr ê. Wa heme dayîkî bêrê têhet. Wa heme kurdî veng vejê û bibê yew veng. Tutê mi çi biwazê, ma zî eynî çî wazenê wa paştdayîş bidê tutanêma."

	&nbsp;

	'Tepişteyan tena meverdê'

	&nbsp;

	Besrîye Ozer Zîndanê Cinîyan ê Gebzeyî de ya û 25 serrî yo tepişte ya. Besrîye heta nika 4 rey kewta çalakîya grevê vêşanîye. Dayîka aye Erzîhan Ozer, dîyar kerd ke 2 serrî verê zî grev de bîya û vat: "Seba tepişteyan ganî çîyêk bêro kerdene. Seba pandemî tedayê serê tepişteyan tewr zêde bi. Wa êdî tutê ma nêkewê grev. No tecrîd wa wirzo. Ganî ma sey keye, wayîrê tutanê xo vejîyê û înan tena nêverdê."

	&nbsp;

	'Wa pêro kesî vejîyê meydanan'

	&nbsp;

	Erzîhane tewr peyîn wina vat: "Serrê 1996 -1997 de reyna tepişteyî kewtibî grevê vêşanîye. Seba paştdayîşê tepişteyan, ma zî tewrê çalakîya Rêzanî bîbî. Dimayê ke polîsan eşt serê komele, ma çalakîya xo Partîya Saadetî de dewam kerd. Ûca de zî polîsan eşt serê ma û ma ameyî destbendkerdiş. Ma çalakîya xo ya vêşanîye destbendkerdiş de zî dewam kerd. O wext kênaya mi zî 26 roj bi ke çalakîya xo ya rojeyê mergî dewam kerdêne. O wext ma dayîkî kuçeyan de bî. Ewro zî ez veng dana dayîkan, seba tutanê xo vejîyê meydanan."

	&nbsp;

	&nbsp;