Merdimê tepişteyan ra vengdayîş: Wa cenazeyî nêvejîyê 

2021-02-02 09:22:34


	 

	 

	AMED - Di lajê Şadîye Hayme tepişte yê û Şadîye vengdayîşê qebulkerdişê waştişê tepişteyan kena û vana: "Ma êdî nêwazenê cenazeyî zîndanan ra vejîyê."

	 

	Zîndanan de bi amancê ke tecrîdo giran serê Rayberê PKKyî Abdullah Ocalanî ra bêro wedaritiş û binpaykerdişê heqan yê zîndanan peynî bibê, tepişteyî 27ê teşrîna peyêne de dest bi grevê vêşanîye yê bêdem û bidor kerdî. Grev 68 rojî yo dewam keno û merdimê tepişteyan seba nê bi endîşeyîn ê.

	 

	2018 de bi rayberîya Leyla Guven zî grev amebi destpêkerdiş û nê prosesî de zî tepişteyê bi nameyê Îbrahîm Hayme ke zîndanê Tîpê D yê Amedî de maneno û Mehmet Hayme ke zîndanê Asayîşê Berzî yê Bolu de maneno, kewtibî grev. Herdi bira tewrê grevê 27ê Teşrîna Peyêne 2020 de ameyo destpêkerdiş zî bîyê. Dayîka înan Şadîye Hayme dîyar kerd ke seba rewşa ekonomî nêeşkenê şêrê pêvînayîşê lajê xo ke zîndanê Boluyî û vat, aye cuya tepişteyan ra bi endîşeyîn a.

	 

	'Ez lajê xo nêvînena'

	 

	Şadîye dîyar kerd ke her wext tutê aye û mêrdeyê aye ameyê destbendkerdene û tepiştene. Sewbîna kênaya Şadîye prosesê qedexeyê vejîyayîşê teberî yê Nisêbînî de dinyaya xo bedilnaye. Her di lajê aye nika tepişte yê û hem bê îmkanîyê ekkonomî û hem zî pandemî ra nêeşkena şêro lajê xo. Şadîye wina dest bi qiseykerdişê xo kerd: "Bi serrêke ez nêeşkena şêrî Bolu verê lajê xo. Eke îmkan bibayîne ez o her hewte bişîne. Tena lajê mi xebityayîne û debara keyeyî kerdêne. No zî seba pandemî kafe ameyî padayîş û nika bêkar mendo."

	 

	'Kezeba mi veşena'

	 

	Şadîye wina qedêna: "Ez rewşa tepişteyan ra zaf bi endîşeyîn a. Seba ke demê vîyarte de zî rewşa înan baş nêbî. Ganî heqê tepişteyan bêro naskerdiş û sewbîna waştişê tepişteyan bêrê qebulkerdiş. Kezaba mi veşêna. Ganî waştişî bi ca bêrê. Ma nêwazenê kes bimiro, la hukmat vera waştişê tepişteyan bêveng o."