'Prosesê ewro de êdî yewîye şert a' 

2021-02-02 09:19:19


	 

	 

	BEDLÎS - Hemsereka HDPyî ya Tetwanî Sarîya Yilmaz, bale ant serê girîngîyê yewîya neteweyî ya kurdî û vat: "Eke ma biwazê na seserre biba seserre kurdan, ganî ma yewîya xo bi ca bîyarê. Şertê ewro de yewîye şert a."

	 

	Xebatê yewîya neteweyî ya kurdî hem herême û hem zî Herêma Federal a Kurdistanî de dewam kenê. Rojê vîyarte de Wan û Êlihî de bi rayberîya Kongreya Komela Demokratîk (KCD), Partîya Herêmê Demokratîk (DBP), Tevgerê Cinîyê Azad (TJA) û Partîya Demokratîke ya Şaran (HDP) ra pêvînayîşê girîng şaristanan de ameyî kerdene. Pêwa astangî û hêrişan, Wan û Êlih de rayrayîş ameyî organîzekerdene û şarî waştişê xo ard ziwan.

	 

	Pêwa xebatê nê rengî şar reaksîyonê xo vera polîtîkayê PDKyî yê herême danê. Derheqê babete de hemsereka HDPyî Tetwanî Sariya Yilmaz qisey kerd û bale ant serê girîngîyê yewîya neteweyî.

	 

	'Seba her 4 parçeyan yewîye'

	 

	Sarîya destpêkê qiseykerdişê xo de bale ant serê girîngîyê yewîye û vat: "Kurd û partîyê kurdan ameyî têhet û hemleyê girîng eştî. Vakurê Kurdistanî kêm bo zî bî yew. La yewbîyayîşê her 4 parçeyê Kurdistanî girîng o. Heta kurdî nêrê têhet do rastê merg û tehdîdî bêrê. Heta kurdî nêrê têhet do bi asîmîlasyon, koçberî, feqîrî dir rî bi rî bimanê. Kam cî partîya sîyasî bena wa biba, kam ci perçe beno wa bib do her wext kurdî vinî bikerê."

	 

	'Yewîya Kurdî şert a'

	 

	Sarîya, dîyar kerd ke her çar parçeyê destkewtişê kurdan estê û nê bi destê PDK û îqtîdarî kewenê binê tehluke û wina vat: "Seba yewîya neteweyî cinîyan rol girewt serê xo. Şarê Kurdî zî yewîye wazeno. Seba nê çalakî û vengdayîş ame kerdiş. Eke ma biwazê na seserre biba seserra kurdan ganî na yewîye bi ca bêro. Têhetameyîşê şarê kurdî şert û berpirsîyarî yo. Yewîya kurdan şert a."

	 

	'Pêro netewî binê rîsk de yê'

	 

	Sarîya peynîya qiseykerdişê xo de ard ziwan ke eke kurdî nêwazê newe ra qirkerdiş û dej biancê ganî seba yewîye têkoşîn bikerê û vat: "No şerî ra, koçberîya Rojhelatê Mîyanên kêm bo zî do bikewo. Kurd zî ganî sey heme komelê bîn seba azadî biciwîyê, bêrê têhet. Cografyaya Mezopotamya de kurd, tirk, ereb û suryanî binê rîskî de yê. Heta yewîye bi ca nêro, aştî zî mimkin nîya. Wexto ke aştî bêro, do aştî bêro Rojhelato Mîyanên zî."