Sakîneya 75 serrî: Her hêriş xo dir serewedaritişêko newe awan keno 

2021-01-31 09:29:13


	 

	Medya Uren 

	 

	MÊRDÎN - Sakîne Kudaya ke 75 serrî ya 12 serrîya xo de ameya zewicnayîş û 14 serrîya xo de tutî ardê dinya. Dayîka 9 tutan Sakîne, heta ewro zî hem vera serdestîyê keyeyê xo û hem zî hemverê serdestîyê dewlete de mîyanê têkoşînî de bî. Seba Sakîne her hêriş xo dir serewedaritişêke newe awan keno.

	 

	 Cinîyê kurdî cuyêka pirr têkoşîn rêsenê. Rey rey vera hişmendîyê komelî, rey zî vera sîstemî. Bi hêzê xo vera tersî vejênê û seba kesê bînan zî benê feyz. Sakîne Kudaya 75 serrî nê kesan ra yew a ke tutîya xo ra heta nika cuya xo mîyanê zehmetî de cuyaya. Tutê xo zî musnayê têkoşîn. Ma do nika hîkayeya cuya Sakîne şima rê vajê.

	 

	Sakine bi eslê xo Amed ra ya û hema emrê 12 serrî de bi zor, bi mêrdeyê 20 serrî ci ra pîlêr dir ameya zewicnayîş. Dimayê zewicnayîşî aye anê şaristanê Mêrdînî û bi keyeyê mêrdeyê xo dir cuyena. Hem tut bîya hem zî cayêk xerîb de bîya no aye rê zaf giran ameyo. Sakîne 14 serrîya xo de tut ana dinya. Aye hema tutîya xo de pêro rîyê lêşin ê cuye vînena û vera nê her wext xo ver dana.

	 

	Sakîne tim têkoşîn kenê

	 

	Sakîne bi pêroyî de bena dayîka 9 tutan. Hetêke ra bêrîvanî kena û hetêke ra tutanê xo pîl kena. Sewbîna rastê hêrişê keyeyê mêrdeyê xo zî yena. Sakîne bi her tewir vera nê çîyan têkoşîn dana. Seba tutanê xo bena mamosteyê cuye û înan rê heskerdişê azadî û têkoşînî musnena.

	 

	Êdî hêrişê dewlete dest pêkeno

	 

	Cuya Sakîne na rey bi hêrişê dewleta tirkî dir derbaz beno. Êdî êdî çiqliqi rêxistinê azadîye Kurdistan de vila beno. Keyeyê Sakîne seba ke kurd ê û bi nê ruhî zî kede danê û rastê tehdîdê dewlete yenê. Sakîne bi xo tewrê rayrayîşan û çalakîyan bena. Her wext tewr vernê de ca gêna û pêro tutê aye tesîr benê. Tutê aye zî tewrê çalakîyan benê û bi desan rey kêna û lajê aye yenê destbendkerdene. Na rewşe heta nika zî dewam kena.

	 

	'Hema janê îşkenceyê înan ciwîyena'

	 

	Sakîne ma rê wina qal kerd: "Bi şewe û roje tebatî nêdayî ma. Bi desan leşker dorê taxe girewtêne û serê keyeyê ma de ameyîne. Ma hemine kom kerdêne û berdêne qereqol. Bi çîyê ke ma nêkerdê ma sucdar kerdêne. Îşkenceyê înan serê ma de qet nêqedîya. Kînê înan seba kurdan o. Emrê mi şino 80 serre û ez hema zî janê îşkenceyê înan ciwîyena."

	 

	Îxraç û tepiştişê bêhuqûqî dest pêkenê

	 

	Sakîne dewam de wina vat: "Hêrişî xo dir serewedaritişêko newe awan keno. 2 torê mi bi nameyê Seyît Riza (Dijwar Baran) û Elî Şêr (Şiyar Mazlum) serra 2011 tewrê refê gerîla bî. Her di datîzayê mi zî tewr benê û şahadetê înan eynî serra 2018 de pê dir beno. No tesîr serê keyeyê ma de kerd. Pîyê Seyît û Elî rastê hêrişan yenê. Lajê mi mamostetî kerdêne la bi KHKyî ameyî îxrackerdene. Lajê aye bîn Abdulkadîr zî bi hawayêk bê huqûqî yeno tepiştiş."

	 

	'Se kenê wa bikerê m akurd ê'

	 

	Sakîne tewr peyîn wina vat: "Ma cuya xo bi no reng derbaz kerd. Ma rastê şîdet, tehdîd û îşkenceyî ameyî. No hema zî peynî nêbîyo. Lajê mi Abdullkadîr bi îşkence ame birîndarkerdene û lingê ey felç bîyo. Bi serran o tepişte yo û îşkence dewam keno. Ma zî dayîk ê. Ma aştî û azadî zêdeyêr çîyêk nêwaşto. La se kenê wa bikerê ma kurd ê."