Keyeyê tepişteye: Ferzkerdişê poşmanî bêehlaqî yo

2021-01-31 09:27:02


	 

	STENBOL- Ame dîyar kerdene Mîzgîn Çîçek ke hema cezaya aye nêameya tesdîqkerdene, poşmanî ci rê ameya ferzkerdene. Pîyê aye Mîrzeydîn Çîçek wina vat: "No çîyo ke yeno ferzkerdiş, bêehlaqî yo. Bi qanûnê poşmanî dir amanc kenê ke înfazê tutanê ma biveşnê û tepişte verdê." Mîrzeydîn seba grevê vêşanîye vengdayîşê rayapêroyî kerd.

	 

	Bi sebebê qanûnê ‘Rêziknameyê bi Merkezê Sinifkerdene û Taqîbkerdene yê Ercnayîşê Tepişteyan' dir yo ke Wezaretê Dade amade kerd û 1ê Çele de rojnameyê fermî de ame vetene, tepişteyê sîyasî ke cezaya înan peynî bîya zî nênê tahlîyekerdene. Tepişteyan rê ‘poşmanî yeno ferzkerdene’ û seba qanûno ke ameyo vetiş, tepişteyî rewşa baş ra feyde nêgînê. Zîndanê Cinîyan ê Şakranî yê Alîaga yê Îzmîrî de tepişteya bi nameyê Mîzgîn Çîçek hîrê serrî yo tepişte ya û hema cezaya aye nêameya tesdîqkerdiş. Ame zanayîş ke poşmanî Mîzgîne rê ameyo ferzkerdiş.

	 

	'Seba ke kitab erşawit zîndan ameye tepiştene'

	 

	Mîzgîna ke wendekara beşê cografya ya Fakulteya Edebîyatî ya Unîversîteya Egeyî bî, bi sebebê ke şî pêvînayîşê birayê xo Ugur Çîçek ke zîndanê Tîpê T yê Odemîşî de tepişte yo, kitab erşawita zîndan û parekerdişê çapemenîya komelî 2017 de ameye tepiştene. Mîzgîn bi îdiayê ‘endamîya rêxistine’ rastê 6 serrî û 3 mengî cezaya zîndanî amî. Pîyê aye Mîrzeydîn Çîçek dîyar kerd ke dosya kênaya aye hema dadgerî de ya û bale ant serê binpaykerdişê heqan ê tepişteyan rê yeno ferzkerdiş.

	 

	'Şakran de rumetê merdiman binê lingan de yo'

	 

	Mîrzeydîn dîyar kerd ke verê ke bi tepşênê her wext ameyîne taqîbkerdene û vat: "Bi pandemî dir binpaykerdişê heqan zêde bî. Bi hûmartiş kitaban danê. Çî mî ke me şawenê nêdanê. Xeylêk mektubu yenê vinîkerdiş. Pêro zîndanan de eynî problem esto. Şakran de bi çimêke cîya ewnîyenê ma ra. Ez şina zîndanê Odemîşî zî la sey Şakranî rumetê merdiman binpay nêkenê."

	 

	'Bi qanûn bêahlaqî ferz kenê'

	 

	Mîrzeydîn bale ant serê caardişê poşmanî û vat: "Kênaya mi hema cezaya qetî nêbîya. Tena tepişyaye ya. Kesê ke poşman bib xora sere de vanê û ceza nêgînê. Ewro vanê ke ceza ameya dayîş, ameya antiş û qedêyayîş. Tena seba veşnayîşê înfazî vanê qanûn ra feyde bigîrê. Gelo no ça yê dinya de kam ci qanûn de esto. Na rewşe ça de esto? No çîyo ke yeno ferzkerdene, bêehlaqî yo. Bi nê amanc kenê ke înfazê tutanê ma biveşnê û tewr zêde tepişte verdê."

	 

	'Ganî ma bibê vengê tepişteyan'

	 

	Mîrzeydîn terw peyîn bale ant serê grevê vêşanîye û vat: "Lajê mi Ugur Çîçek zî nika grev de yo. Tepişteyî vera nêheqî kewtî grev. Dewlete tutê ma tepiştî, pêro heqê înan destê înan ra girewtê. Ma ewro Îmralî ra biewnê. Bi mengan o avûkat û keyeyî nêeşkenê şêrê. Pandemî kenê sebeb. Ma tutê xo pîl kerdî û heta na roje ardî. La vanê ke tutanê xo dir meyerê têhet. Gelo kam nê çî qebûl keno. Ganî ma bêbê vengê tepişteyan. Parlamenterê m aganî bibê vengê ma û heqanê ma bipawê. Kes vengê tepişteyan nêeşnaweno. Xora çapemenîya hetgir nêdana. Ganî ma vengê tepişteyan bidê eşnawitiş."