'Bi tepiştişê Ayşe nêeşkenê hêzê cinîyan bişikinê' 

2021-01-30 09:14:38


	 

	 

	Melîke Aydin

	 

	MUGLA - Cinîyê ke Mugla de ciwîyenê, tepiştişê Vervatoxa TJAyî Ayşe Gokkan şermezar kerdî û vatî: "Wazenê bi tepişteyan tevgerê cinîyan qels bikerê. La ê nêeşkenê hêzê cinîyan bişiknê. Ma do têkoşînê xo dewam bikerê."

	 

	Vervatoxa Tevgerê Cinîyê Azadî (TJA) Ayşe Gokkan Amed de ameye destbednkerdiş, dima ra zî ameye tepiştene û aye berdî Zîndanê Cinîyan ê Amedî Dimayê tepiştişê Ayşe Gokkan cinîyan reaksîyon ramojna û dîyar kerdî ke ê bi amancê qelskerdişê tevgerê cinîyan wina hêriş kenê. Waştişê serbest veradayîşê Ayşe kerdî. Endama Platformê Cinîyan ê Bodrumî ya seba Têduştî Elîf Aytaç, Hemsereka Kongreya Demokratîke ya Şaran (HDK) a Muglayî Dîlek Gokçîn û Meclîsê Cinîyan ê Partîya Demokratîke ya Şaran (HDP) a Muglayî Berna Koç ercnayîşê xo ajansê m arê pare kerdî.

	 

	'Nê caardişî bi amancê şikinayîşê têkoşînî yo'

	 

	Elîfe, dîyar kerd ke Ayşe serdayîşê platformî de nas kerda û vat Ayşe îşkenceyê hêzê dewlete yê hemverê cinîyê herême qal kerda û vat: "Ez nê tepiştişî hemverê heme tevgerê cinîyan ê Tirkîya û herême vînena. Goreyê mi nê hewldayîşî heme herêman de yenê kerdene. Nê heme zî seba qelskerdişê tevgerê cinîyan yeno kerdene. Ez zaf şaş manena. Ganî demildest Ayşe bêra veradayîş."

	 

	'Tersê hemverê têkoşînê azadîya cinîyê kurdî ramojneno'

	 

	Dîleke zî reaksîyon ramojna û vat, Ayşe ke heme cuya xo seba têkoşînê azadî xerc kerda û nê rayîrî de xeylêk bedel da ya, qet vindertişê xo rê tawîz nedaya û vat: "No qerarê îqtîdarê faşîst yê AKP-MHPyî hemverê têkoşînê azadîya cinîyan o. Ma nê qerarî nas nêkenê. Ma kîşte Ayşe de yê û tekoşînê aye ke mendo ma do dewam bikerê. No ê ewil nîyo, verê Leyla Guven ameye tepiştene û 22 serrî ceza ci rê ameye birnayîş. No zî tersê vera hemverê tevgerê azadîya cinîyê kurdan ramojneno."

	 

	'Ma do têkoşînê xo bidê'

	 

	Berna zî reaksîyonê xo wina ramojna: "Hem Leyla Guven û hem zî Ayşe Gokkan bi serran o têkoşînê cinîyan bêmabên dewam kenê. Hedef girewtişê înan bi amancê şiknayîşê têkoşînî yo. La ê xo xapênenê. Cinî do sere nêtewênê. Embazê ma nîmeyê emrê xo zîndanan de derbaz kerdî. Do hem zere û hem teber de têkoşînê xo dewam bikerê. Do m arê bibê îlham. Şikinayîşê nê xoverdayîşî hedê kesî nêkewto. Ma a bawerî de rayîrê azadîya cinîyan de rayîra şêrê."