Keyeyê tepişteyan: Bêvengî merg o 

2021-01-30 09:13:22


	 

	 

	Rojda Aydin

	 

	ŞIRNEX - Keyeyê tepişteyan yê Şirnexî Hatîce Beytûr û Taybet Avşar bale antî serê rewşa tepişteyan û vengdayîşê wayîrvejîyayîşê grevê vêşanîye kerdî. Keyeyan wina vat: "Ma nêwazenê zîndanan ra cenazeyî nêvejîyê. Bêvengî merg o. Ma vengê xo berz bikerê."

	 

	Zîndanê Tirkîya û herême de 27ê Teşrîna Peyêne 2020 de vera tecrîdê serê Rayberê PKKyî Abdullah Ocalan û binpaykerdişê heqan de tepişteyan grevê vêşanîye dest pêkerdî. Grevê vêşanîye bi koma 13ine kewt roja xo ya 65ine. Pêwa çalakîya grevê vêşanîye hema zî bêvengîyê hukmatî dewam keno. Merdimê tepişteyan vera nê hewl dayî ke vengê tutanê xo bidê eşnawitiş. Merdimê tepişteyan ê Şirnexî Hatîce Beytûr û Taybet Avşar bale antî serê rewşa tepişteyanê xo û vengdayîşê wayîrvejîyayîşî kerdî.

	 

	'Lajê mi surgunê Zîndanê Dîlokî kerdî'

	 

	Dayîka Osman Beytûro ke Zîndanê Dîlokî de yeno tepiştene Hatîce Beytûr, vat ke lajê aye 6 serrî yo zîndan de yo û 12 serrî yo ceza ci rê ameya birnayîş. Hatîce, vat ke lajê aye bi 5 serrî yo Zîndanê Tîpê T yê Şirnexî de mendo û vat: "Lajê mi verê 4 mengan surgunê zîndanê Dîlokî kerdî. Bi 4 mengî yo, lajê xo mi nêdîyo. Lajê mi bi telefon ma geyreno û qalê tedayî keno. Sewbîna zîndanê Dîlokî de tepişteyê sîyasî çin ê. Tena lajê mi û kesêk bîn koxuşêk de yê."

	 

	'Bi tepişteyan nêeşkenê ma bitersnê'

	 

	Hatîce vat çîyê ke qantînê zîndanî ra gênê zaf vayê û vat: "Bi hawayêko dişminî tutanê ma ra ewnîyenê. Lajê mi vat, seba ke uca ra înan vejê, waştişname dayê la cewab înan rê nameyo dayene. Lajê mi destûr nêdano ma ke ma şêrê pêvînayîşê ey. No zîndanê Dîlokî newe ameyo viraştene û tede çîyêk zî çin o. Masa, kursî, televîzyon û xeylêk çîyê bîn înan girewto. Wexto ke lajê mi surgunê Dîlokî kerdî, cilê ci nêdayê. Pêro eşyayê tutanê ma peyser erşawitî. Waştişê ma oyo ke tutanê ma vera bidê. Tutê ma çîyêk nêkerdê û ameyê tepiştene. Ma kurd ê û do nêeşkê ma bi tepiştiş bitersnê."

	 

	'Ma nêwazenê ke zîndanan ra cenazeyî vejîyê'

	 

	Hatîce dewam bale ant serê grevî û vat: "Ma wazenê waştişê tutanê ma bica bîyarê. Wa no teda serê tepişteyan wedarnê. Pêrar tutê ma reyna kewtibî grev, o wext xeylêk problemê weşîye ciwîyayî. Xeylêk tepişteyan peynîya cuya xo ardî. Ma nêwazenê zîndanan ra cenaze vejîyê. Ganî her kes hemverê tecrîdê girankerde wirzê serê lingan. Ganî ma şarê Kurdî bêveng nêmanê. Seba tutanê xo ma zî verê xo bidê meydanan. Heta ke waştişê tutanê ma bi ca bêrê."

	 

	'Bêvengî merg o'

	 

	Dayîka tepişteyî bi nameyê Ayaz Avşaro ke wextê ke 17 serre bîyo ameyo tepiştiş, 16 serrî ceza ci rê ameya birnayîş û 6 serrî yo zîndan de yo Taybet Avşar zî dîyar kerd ke wa hukmat hemverê waştişê tutanê înan bêveng nêmanê. Taybetî veng da hukmat ke ê nêwazenê zîndanan ra cenazeyî vejîyê û vat: "Ganî wa waştişê tutanê ma bi ca bîyarê. Ganî ma şarê kurdî hemverê na çalakî bêveng nêmanê. bêvengî merg o."