'Munaqeşeyê padayîşê HDPyî hêrişê hemverê cinîyan o'

2021-01-29 09:35:09


	 

	AMED - Reaksîyonê vera munaqeşeyê padayîşê HDPyî dewam kenê. Sîyasetmedaran munaqeşeyê padayîşî şermezar kerdî û dîyar kerdî ke waştişê padayîşê HDPyî hêrişêk vera hemverê cinîyan o."

	 

	Hêriş û tedayê hemverê Partîya Demokratîke ya Şaran (HDP) dewam keno. HDP bi vatişê îqtîdarî dir her roje beno hedef. Heto bîn ra zî demêko derg o serekê pêroyî yê MHPyî Devlet Bahçelî yê seke, 'wa HDP bêro padayîş' zî rojeve de ca girewt. Reaksîyonê vera nê dewam kenê. Bi taybet cinîyan dîyar kerd ke HDP partîyêke cinîyan o û vat, no vatiş eynî wextî de hêrişêk hemverê cinîyan o.

	 

	Hemsereka Partîya Herêmê Demokratîk (DBP) ya Amedî Seval Gulmez, reaksîyon vera munaqeşeyê padayîşê HDPyî da û vat: "HDP rayê mîlyonan girewto, îrade û omidê şarî yo. Ma qalê partîyêke ke bi hedefê cuyêka hempar awan bikera, kenê. Heme merdimî wayîrê heqê xo yê îfadekerdiş û azadîye yê. La çi heyf, AKP-MHP xêrcê fikrê xo kesêk qebul nêkenê. Seba ke ferasetê înan de demokratîkbîyayîş çin o."

	 

	'Partîyêka esasê cinî de sîyaset kena'

	 

	Sevale bale ant serê mîsyonê HDPyî û vat, partîyêka esasê cinî de sîyaset kena ya û vat: "Sîyaset de heqê cinîyan nîno dayene, problemêko cîya yo. Ma kesê ke serê na herre de ciwîyenê, ganî ma vera yewbînan rêzdar bê. Biewnê ewro merdimî rîyê înan nêhuyeno. Seba ameyoxê xo bêhêvî yê, endîşeyê înan estê. Ez vera hêrişê hemverê HDPyî vengdayîşê xurtkerdişê wareyê demokratîk kena."

	 

	' Partîya HDPyî tevgerê azadîya cinî ra wey bena'

	 

	Temsîlkara Serekîya Pêroyî ya Partîya Sosyalîstî ya Bindestan (ESP) Beycan Taşkiran zî dîyar kerd ke HDP awanî û tabela ra nîno meydan û vat: "6 mîlyon û nîê kesî ray dayî HDPyî. Reyna bi mîlyonan kesî sempatîzanê ci yê. Seba nê zî partîyêke tevgerê şarî ya. HDP partîya bindestan a. HDP partîyêke tevgerê azadîya cinîyan ra wey bena ya. HDP têkoşînê ekolojî dano. Seba planê ke înan yê rijnayîşî pê nêgirewt, nika hewl danê padê."

	 

	'Ganî  her kes dorê HDPyî de bibê çember û xo rêxistin bikerê'

	 

	Beycane tewr peyîn qiseykerdişê xo de veng da pêro kesan ke dorê HDPyî de bibê çember û xo rêxistin bikerê û vat: "Heta ke ma bê rêxistin bibê, do hêrişî zî bibê. Seba nê zî berpirsyarî û wezîfeyê ma yo sereyîn têkoşînê vera faşîzmî yo."

	 

	'Do vernîya padayîşê partîyê bîn zî abikero'

	 

	Partîya Karkerê Tirkîya (TÎP) Reyhan Çakmak zî reaksîyon ramojna û vat: "Ez nê munaqeşayan rast nêvînena û şermezar kena. 6 mîlyon û nîm merdimî ray danê HDPyî. Ma derheqê padayîşî ey qebul nêkenê. Êyê ke hetê demokrasîyê ganî qebul nêkerê. Heta ke cewabêk xurt seba înan nêro dayîş do konseptê înan hêrişan zî pîl bibo û vernîya padayîşê partîyê bînan zî abibo."