'Lazim o cinîyê êzidî hemverê şerê taybetî de xo bi rêxistin bikerê' 

2021-01-27 09:30:05


	 

	Rojda Seyidxan

	 

	QAMIŞLO - Hemsereka PYDyî ya qezaya Tirbespiyî Hedîya Şemo derheqê merdişê bi guman ê 3 cinîyê Êzidîyê ke kampê penabaran yê Başûr de yê wina vatî: "Lazim o cinîyê Êzidî hemverê plan û sîyasetê ke serê Êzidîyan de yenê kerdene, mîyanê xoverdayîşî de bê. eynî wextî de hemverê hêrişê şerê taybetî de xo bi rêxistin bikerê."

	 

	Demê peyîn de hedîseyê xokiştişê cinîyan mîyanê komelî êzidî de zêde bîyo. Wargehê multecîyê Êzidî yê Dihokê Başûrî Kurdistanî 3 cinîyê ciwan bi hawayêko bi guman peynîya cuya xo ardî. Sebebê xokiştişê cinîyê êzidî hema zî dîyar nêbîyo. Derheqê merdişê bi guman yê cinîyê êzidîyan de cipersayîşêko hîra zî nêame destpêkerdene. Derheqê babete de Hemsereka Partîya Yewîya Demokratîk (PYD) a qezaya Tirbespiyî Hediya Şemo ercnayîş kerd.

	 

	'Tesîrêko negatîf serê psîkolojîyê ciwanan de esto'

	 

	Hedîya bale ant serê rewşa multecî û tesîrê ci yê serê psîkolojîyê ciwanan û wina vat: "Kurdê Êzidî xeylêk fermanan ra derbaz bîyê û rastê xeylêk hêrişan ameyê. Fermano peyîn serra 2014 de hetê çeteyê DAIŞî ra ame kerdene. Netîce de bi hezaran cinî ameyî destbendkerdene, tecawuzkerdene û bi hezaran merdimî mecbûrê koçberî bî. Nê demê peyîn de 3 cinîyê ciwan yê êzidî wargehê multecîyê êzidî yê Dihokî de peynîya cuya xo ardî. Helbet cuya kampan cuyêka zehmet a. Bi taybetî seba ciwanan no tewr zehmet o. Her het ra tesîrêko negatîf serê psîkolojîyê ciwanan de esto. Sebebê pîlî estê ke ciwanan ver bi xokiştişî beno."

	 

	'Lazim o cinîyê êzidî hemverê şerê taybetî xo bi rêxistin bikerê'

	 

	Hedîya dewam de wina vat: "Şero taybet ke hetê îqtîdaran ra yeno kerdene, tesîrêko xirab serê cinîyan de keno. Lazim o ciwanî tîya ra tepya aya bê. Lazim o cinîyê êzidî seba heq û dewaya xo têkoşîn bikerê û hemverê şerê taybetî xo bi rêxistin bikerê. Dewleta tirkî wazena asayîşê Şengalî wedarno û Şengalî îşxal bikero. Seba nê têkoşîn girîng o. Xokiştiş çareserî nîyo. Ma do zî vera her tewir hêrişî xo ver bidê û komelê xo bi hêzê ciwananê xo awan bikerê."

	 

	'Ma do vera hedîseyê xokiştişî bigîrê'

	 

	Hedîya veng da temamê ciwanê êzidî kerd ke bi rayîrê perwerdeyî xo fikrê xokiştişî ra azad bikerê û vat: "Seba ke ma rayîr vernîya nê hedîseyan bigîrê, lazim o ma keye ra dest pêbikerê ke derd û dejê tutanê xo goşdarî bikerê. Lazim o ciwanê êzidî zî xo perwerde bikerê û îmkanê baş seba cuyêka bi hizûr awan bikerê. Bi rayîrê perwerdeyan ma do rayîr vera hedîseyê xokiştişî bigîrê."