Keyeyê Gulîstan Doku aqûbetê kênaya xo serekkomarî ra pers kerd 

2021-01-26 14:42:29


	 

	 

	MERKEZÊ XEBERAN - Keyeyê Gulîstan Doku aqûbetê kênaya xo SerekKomar Tayyîp Erdoganî ra pers kerd.

	 

	Wendekara Unîversîteya Munzurî Gulîstan Doku ke 5ê Çeleyê 2020 ra heta nika ameye vinîkerdene, tu zanayîş ci ra nîno girewtene. Cipersayîşê derheqê vinîbîyayîşê Gulîstane de dewam keno. Rojê vîyarte de bamarîyê Zaînal Abarakovo ke vinîbîyayîşê Gulîstane ra berpirsiyar yeno vînayene Engîn Yucel çarçewaya cipersayîşê ame destpêkerdiş de polîsî ra ame îxrackerdene. 

	 

	Keyeyê Gulîstane ke serrêke zêdeyêr o seba vînayîşê ci têkoşîn keno, verê nê şibi Enqere û bi Wezîrê Karê Mîyanxoyî Suleyman Solu dir pêvînayîş kerdibi. Ame dîyarkerdene ke keye na rey zî bi Serekkomar Recep Tayyîp Erdogano ke seba serrgera erdlerzê Xerpêtî amebi şaristan, pêvînayîş kerdê.

	 

	Goreyê zanayîşê ke çimeyî ra ame girewtene, maya Gulîstan Doku Bedriye Doku û pîyê aye Halît Doku, bi rayîrê Waliyê Dêrsimî Mehmet Alî Ozkan bi serekkomar dir pêvînayîş kerdî û waya aye Aygul Doku zî bi rayîrê telefonî tewrê pêvînayîşî bîyê. 

	 

	Waya Gulîstane Aygul Doku derheqê pêvînayîşî de zanayîş dayî û vat, "Ma serekkomarî ra vat ke cayê Gulistane, Zaînal zano û ganî qisey bikero. Serekkomar zî vat ke çarçewaya huqûqî de çi destê înan ra bêro do bikero û vat, do serê babete de vindero.”