Cinîyê Wanijî: Aştî bi Abdullah Ocalanî dir mimkin a 

2021-01-23 09:05:56


	 

	WAN - Cinîyan reaksîyon vera tecrîdê serê Rayberê PKKyî Abdulllah Ocalanî ramojnayî û vengdayîşê paştdayîşê seba grevê vêşanîye yo tepişteyan dayo destpêkerdene kerdî û vatî: "Yew vatişêke fekê Abdullah Ocalan vejêno, hizûr seba pêro dinya ano. Aştî û azadî destê Abdullah Ocalanî de yo."

	 

	Bi rayberîya Hemsereka Kongreya Komelê Demokratîk (KCD) Leyla Guven, bi amancê tecrîdê serê Rayberê PKKyî Abdullah Ocalanî peynî bibo 7ê Çeleyê 2018 de grev ame destpêkerdene û grev 200 rojî dewam kerd û grev resa bi amancê xo. La serrêke dima ra reyna tecrîd kewt dewre. Dimayê ke tecrîd reyna kewt dewre, zîndanan de zî binpaykerdişê giran zêde bî. Tepişteyê sîyasî yê zîndanê herême û Tirkîya de 27ê Teşrîna Peyêne de bi amancê ke tecrîd peynî bibo û peynî binpaykerdişê heqê cuye bêro dayîş, dest bi grevê vêşanîye yê bêdem û bidor kerdî. Paştdayîşê seba waştişê tepişteyan zî dewam kenê.

	 

	'Yew vatişêke Abdullah Ocalanî do hizûr bîyaro'

	 

	Saadet Oklu tecrîdê serê Abdullah Ocalan şermezar kerd û vat her kes vera tecrîdî reaksîyonê xo bîyaro ziwan û wina vat: "Aştî bi wedaritişê tecrîdî mimkin a. Heta tecrîd dewam bikero, do gonî zî nêvindero û do hizûr zî nêro. Her çî Abdullah Ocalanî rê asteng kerdê. Wa reyke şêrê bivînê. Yew vatişêke fekê Abdullah Ocalanî ra vejîyo, do hizûr bîyaro dinya. Aştî û azadî destê Abdullah Ocalanî de ya. Wa zerrîya dayîkan nêveşa. Ma vera nê yê. Ez vengdayîşê paştdayîşê grevan kena"

	 

	'Wa waştişê tepişteyan bêrê qebulkerdiş'

	 

	Saadete bale ant serê şert û mercê xirabî û vat: "Ez veng dana wezaretê dade, wa binpaykerdiş û îşkenceyê zîndanan peynî bikero. Tutê ma zîndanan de nêweş kewtî. Ma dayîkê û ma xemgîn benê. Ma nêwazenê zîndanan ra cenaze vejîyê. Wa waştişê tepişteyan bi ca bêrê. Caardişê waştişan zor nîyo, ten aîmzayêk ewnîyeno. Erdogan aştî nêwazeno, her wext şer wazeno. Seba înan no derd nîyo. Qesre seba înan weş a. Merdişê polîs, leşker û gerîla xemê înan de nyê. Tutê înan pêro dinya de geyrenê û betlane kenê. Seba înan problem nîyo."

	 

	'Wa wezaretê dade baş goşdarî bikero'

	 

	Behîce Abî zî vat ke wezaretê dade vera grevan bêveng o û vat: "Ma dayîkî, tutê xo sey parçeyêk ganê xo ardê dinya. Seba ke Erdogan tutanê ma zîndanan de bikişo ma nêardê dinya. Seba nê dayîkê leşker, polîsan û ma pêro sey yewbînan ê. Ez veng dana wa wezaretê dade bi edalet tê bigeyro. Wa çimanê xo, goşê xo abikero. Tutê înan zî estê. Gelo wijdanê înan senî qebul keno. Wezîrê Dade reformek de vatişêk vat dima ra destbendkerdişî zêde bî."

	 

	'Tu îdarekarê welatêke sey  Erdoganî zulm nêkerd'

	 

	Behîce tewr peyîn vat, tu cayê dinya de seke serekkomar Erdoganî zulm nêkerdo û vat: "Ganî tecrîd bêro. 50 serrî yo dayîkê leşker, polîs û gerîlayan bermenê. Emîne Erdogan nêbermena, seba ke qesra ke tutanê înan rê nobeta gêna esta. Madem meclîs seba dewlete xebityena, wa o wext tutanê xo zî berê sînoran. Ma pêro bibê yew. YE û DMME seba wedaritişê tecrîdî çîyêk bikero, do tecrîd bêro wedaritene. Ma tecrîd qebul nêkenê. Wa Abdullah Ocalan bi keye û avukatanê xo dir bêro têhet. Ez veng dana pêro kesan, wa tecrîd peynî bibo û tutê ma zîndanan de nêmirê."