Cinîya ke vera zulmî sere nêtewêna: Zor û tedayan qebûl mekerê 

2021-01-23 09:04:58


	 

	ŞIRNEX - Helîme Kara yew a cinîyê ke pêwa tedayê keye û camêrdo ke ey dir zewicnaye bîya, sere nêtewêna ya. Helîma a ke zordestî qebûl nêkerd û dimayê prosesêko derg ê têkoşînê Cizîrê Şirnexî bi deştiş debara xo kena vat, "Wa cinî zor tedayan qebul nêkerê."

	 

	Wexto ke merdim bala xwe dano cuya cinîyan, her cinîyêke hîkayeyêke aye ya balkêş ke pêwa teda û zordestîyê sîstemî pederşahî ver xoverdayîşêko girs esto. Helîme Kara zî nê cinîyan ra yew a. Helîme, serê waştişê keyeyê xo, seba birayê xo bi rayîrê berdelî ameya zewicnayîş û dimayê zewacî cuya aye açeryaya cehenem. La Helîme pêwa nê tedayan sere nêtewênayo û hem vera keyeyê xo, hem zî vera mêrdeyo ke zulm û zorî ci rê kerdo, xo ver daya. Ma zî xo resna Helîmeya têkoşer ke nika pêwa 3 tutanê xo Cizîrê Şirnexî de têkoşînê cuye dana ke ma rê qalê hîkayeya xo kerd.

	 

	Hemverê zulmê camêrdan ma sere wedarit

	 

	Halîme, vana dimayê ke ameya Cizîr de bi ca bîya zî hetê mêrdeyo ke ey dir zewicnaye bîya û hetê keyeyê ra tedayê ke ci rê ameyê kerdene dewam kerdê û vat: "Fek mi ra vera nêdanê. Her wext şîdetê psîkolojîk û fîzîkî serê mi de kerdêne ke ez reyna agêrî. La ez xeylêk karan de xebityaya. Tutîya xo ra heta nika mi xeylêk kar kerdo. Dima ra mi zewicnayî, cuya mi açerya cehenem. Seba ke ez bi zor nêrî zewicnayîş, mi di rey derman werd û mi hewl da ez xo bikişî. Pîyê mi reyke zî fikrê mi nêpersa. Dimayê ke mi xo camêrdo ey dir zewicnaye bîya vera da, ez ameya Amed de bi ca bîya û serrêke perwerdeyê deştişî mi dî. Dimayê ke ez musaya, mi dest bi karê xo kerd û mi 9 serrî Amed de karê terzîtî kerd. Dima ra ez ameya Cizîr û mi karê xo dewam kerd. Nika ez û embazêke xo pîya dikanê xo de pîya xebityenê. Ma pîya cilanê herêmî derznenê."

	 

	Cizîr de dest bi cuyêka newe kerd

	 

	Halîme, dîyar kerd ke cuya aye xeylêk zor û zehmet bîyo û wina vat: "Mi na embaza xo nas kerdêne û mi ra vat, bêre ma pîya bixebityê. Ez zî ameya tîya ma pîya xebityenê. Mi Cizîr de xo rê keye kîra kerd. Fatûre û lazimîyê keyeyî estê. Seba ke ez bi tena xebityena, cuye seba mi zaf zehmet bîya. Cuye nê prosesî de xeylêk zehmet bîya. Bi hîrê mengî yo Cizîr de bi ca bîya. Ez karê deştişê cilanê herême kena û debara xo kena. Ez hem tutanê xo û hem zî lazimîyê keyeyê xo bi ca ana. Seba mi zehmet o, la hetêka ra muhtacê camêrdan nêbena. No mi kêfweş keno."

	 

	‘Tu zulmê camêrdan nêeşkeno xoverdayîşê ma cinîyan bişikêno'

	 

	Halîme, dîyar kerd wa cinî hemverê tedayê dewlete bêveng nêmanê û vat: "Mi heta nika xeylêk zehmetî antê. La mi qetî sereyê xo vera zulmê nêtewêna û mi ey vera da. Ez bi xoverdayîşê xo hata roja ewro ameya. Ez nika zî zehmetîyan ancena, la seba ez ci ra bîya, tay rehet a. Bi têkoşînê mi hemverê zulmî de ez tewr bi hêz bîya. Mi bi kiştiş tehdîd kerdî la mi sere nêtewêna û keye ra zî tu kesî paştdayîş nêdayî mi. Eke ez zewicnayî bibayîne, beno ke ez nika kişte bibayîne yan zî tedayê ke mi rê ameyîne kerdene, dewam bikerdêne. La mi zulm qebul nêkerd û seba keye û kesê ke ey dir zewicnaye bîya, remaya ameya tîya. Ez tîya hem xebityena û hem zî bi xo debara xo kena. Çimeyê mi ê debare no dikanê min o."

	 

	'Wa cinî vera şîdetî xo ver bidê'

	 

	Halîme, tewr peyîn qiseykerdişê xo de wina vat: "Wa tu cinî nê zulmî qebul nêkerê û xo ver bidê. Eke ma sere bitewênê do camêrdî zulmê ke ma rê kenê zêde bikerê. Seba nê ganî cinî pîya vengê xo berz bikerê û xo ver bidê. Mi hemverê zulmî qetî xoverdayîşê xo ra fek vera nêda."