
'Xoserîya unîversîteyan lazim a' 

2021-01-20 09:20:38


	&nbsp;

	&nbsp;

	Melîke Aydin

	&nbsp;

	ÎZMÎR - Wendekarê Unîversîteya Egeyî dîyar kerdî ke xoserîya unîversîteyan lazim a û vatî: "Ganî wendekar û heme pêameyîşê unîversîteyan tewrê çalakîyê protestoyan bibê û hemverê tayînkerdişê qeyûman reaksîyonê xo ramojnê."

	&nbsp;

	Rektorê AKPyî Melîh Bulu ke sey qeyûm tayînê Unîversîteya Bogazîçî ame kerdene, sere de hetê wendekaran ra û xeylêk hetê komelî ra ame protestokerdiş. Îzmîr de zî reaksîyon ame ramojnayîş. Hetê wendekran ra Paştdayîşê Unîversîteya Îzmîrî ame awankerdene. Wendekarê ke mîyanê nê paştdayîşî de ca gênê, dîyar kerdî ke îdarekarî sey teşkîlatê AKPyî xebityenê û vera nê caardişê hemverê unîversîteyan vengdayîşê têkoşînê hempar pêameyîşê unîversîteyan ame kerdene.

	&nbsp;

	'Heqê vatişê yê wendekaran çin o'

	&nbsp;

	Wendekara Unîversîteya Egeyî Pinar Usta dîyar kerd ke roja ke rektorê qeyûm tayînê unîversîteya Ege û 9ê Eylulê yê Îzmîrî ameyo kerdene, caardişê bêhuqûqî zî ardê û vat: "Bi pandemî dir unîversîte veng mendî û bê waştişê wendekaran û hîn bername û înşaatê newe ameyî viraştiş. Reaksîyonê vera rektoro ke tayînê Unîversîteya Bogazîçî ameyî ramojnayîş, êdî canêmendişê sînorê hêrsî yo. Ma nêeşkenê mîyanê komelî de xo bîyarê ziwan û rayîr nêdanê ma. Şert û mercê ke m afikrê xo bîyarê ziwan çin o. Ma êdî nêeşkenê unîversîteyan de bernameyanê xo zî viraznê."

	&nbsp;

	'Îdarekarî sey teşkîlatê AKPyî xebityeno'

	&nbsp;

	Pinare dîyar kerd ke îdarekarê unîversîta bi taybetî zî rektor seke teşkîlatê AKPyî xebityeno û wina vat: "Unîversîteyan de akademîsyenê roşnvîrî ameyî îxrackerdiş. Sermayedaranê xo anê û bernameyan viraznenê yan zî paştdayîş danê hetgiranê xo. No het ra îdarî destê ma de nîyo. Ma ancax eşkenê vajê ma xo îdare kenê. No het ra ma vengdayîşê paştdayîşê pêameyîşî kenê."

	&nbsp;

	'Bi GBT tedayan kenê'

	&nbsp;

	Wendekara Unîversîteya Egeyî Derya Emren dîyar kerd ke hewl yeno dayîş ke unîversîteyan bê tesîr verdê û vat, polîsî bi sebebê asayîşî nasnameyê înan gênê û qeydê înan yê GBTyî ewnîyenê û vat: "Pêwa ke wareyê wendekarano zî cipersayîşê asayîşî kenê. Ma do vera tedayan xoverdayîşê xo dewam bikerê."

	&nbsp;

	'Ganî akademî sîyaset ra dûr bo'

	&nbsp;

	Wendekara unîversîteya Egeyî Gul Gokboga zî wina vat: "Seba ke unîversîteyî demokratîk bibê, ganî pêameyîşê unîversîteyan weçînê û wendekarî tewrê qerarî bibê. Ganî îqtîdar unîversîteyan ra dûr bo. Seba xoserbîyayîşê unîversîteyan qetî lazim o. Ganî akademî zî sîyaset ra dûr bo. Hukmatî yenê û şinê. La AKP roja ke ameyo dest eşto pêro çî. Prosesê pandemî de rewşa welatî her ke şino giran beno. Sewbîna ez serewedaritişê Bogaziçî xeylêk bi erj vînena."

	&nbsp;