'Kampanya ma astengîyan dir rî bi rî mende' 

2021-01-19 09:16:18


	 

	 

	SÊRT - Endama Meclîsê Cinîyan a HDPyî Sêrtî Kezîban Dumlu xebatê çarçewaya kampanyaya 'Ma xo pawenê' ke bi rayberîya TJAyî ameye destpêkerdene, ercna û vat: "Her ca de xebatê ma yenê astengkerdene. La ma seba ke xo biresnê cinîyan hewl danê û do têkoşînê ma dewam bikero."

	 

	Tevgerê Cinîyê Azad (TJA) hemverê tecrîdê giran yê serê Rayberê PKKyî Abdullah Ocalan, kiştişê cinîyan, tacîzê tutan û qirkerdişê xoza ser o kampanyaya 'Ma xo pawenê' dabî destpêkerdene. Çarçewaya kampanya de xeylêk çalakî û bername virazîyabî û ame amanckerdene ke şarî bikerê wayîrê hişmendî.

	 

	Sêrt de zî TJA û Meclîsê Cinîyan ê HDPyî xebatê xo kerdî û hewl dayî ke keda cinîyan bidê asênayîş, problemê cinîyan bidê tespîtkerdiş û şîdetê serê cinîyan ramojnê. Meclîsê Cinîyan ê Sêrtî Kezîban Dumlu xebatê Sêrtî ercna.

	 

	'Ma do xebatan dewam bikerê'

	 

	Kezîbane dîyar kerd ke çarçewaya kampanya de bi amancê bale biancê serê krîzo ke welat de yeno ciwîyene, bernameyê cîya viraştê û çarçewaya kampanya de cinîyan dir taxe de ameyê têhet. Kezîbane wina vat: "Cinîyê ke tekstîl de xebityenê, heta cinîyê ke serê erdan de xebityenê ma hewl da ke ma probleman rê bibê çareserî. Ma nêzdî ra dî ke lazimîyê cinîyan bi paştdayîş û serdayîşê wina estê. Ma prosesê vernî zî verê çiman de girewt û ma do xebata xo dewam bikerê. Ma her wext vat ke ma verê cinîyan de yê."

	 

	'Ma rastê astengîyan ameyî'

	 

	Kezîbane dîyar kerd ke hukmat her wext xebatanê cinîyan asteng keno û pêwa nê cinî bi hawayêko xurt tewrê kampanya bîyê û vat: "Prosesê pandemî tesîr xebatan ser o kerd, la ma bi metodê cîya nê çareser kerd. Xebatê ma nê prosesî de her wext ameyîne astengkerdene. Her ware de xebatê ma yenê astengkerdene. La m aher wext seba xo biresenê şarî hewl danê û ma do dewam bikerê."

	 

	'Cinîyan qezenc bidest kerd'

	 

	Kezîbane tewr peyîn qiseykerdişê xo de wina vat: "Bi polîtîkayê tersî hewl dayî ke şarî bitersnê. Netîceyê nê polîtîkayan de destbendkerdiş dest pêkerdî. Verê ra heta nika, her wext teda estbî, la cinî her wext vera nê bi hawayêko xurt vindertî. Ma çarçewaya na kampanya de dî. Cinîyan qezencê cidî bidest kerdî. Tu wext tedayî nêeşkenê ma têkoşînê ma heqdar dûr bifîno."