Cinîyê kedkarê keyeyî: Dewlete nêzana ma senî ciwîyenê 

2021-01-17 09:17:08


	 

	 

	WAN - Cinîyî Kedkarê keyeyî dîyar kerdî ke hemverê krîzê ekonomî her ke şino giran beno. Ganî îqtîdar bêro vurnayene û vatî: "Ma zeytûnan gênê penîr çin o, ma penîr gênê nan çin o. Dewlete nêzana ke ma senî ciwîyenê."

	 

	Seba vîrusê koronayî krîzê ekonomî her ke şi giran bi û tesîrêk pîl serê şarî de kerd. Bi seyan esnafî mecbûr mendî ke dikanê xo padê. Cinîyê ke nêeşkenê nan berê keyeyê xo û betal ê krîz ra zaf tesîr bî. Prosesê pandemî de seba cinîyê kedkarê keye tu fonê hetkarî nêame dayene û zemo ke roj bi roje yeno kerdene zî şar tewr zêde ver bi feqîrî berd.

	 

	'Ser bi serre xirab beno'

	 

	Ayşe Demîr ke seba polîtîkayê dewlete Çelêyê Colemêrgî ra koçê Wanî kerd, dîyar kerd ke prosesê pandemî de seba her çî zam ameyo kerdene û vat: "Dewlete zulm bi ma kena. Ma tena heqê xo wazenê. Her cayê dinya de merdimî wayîrê heqî yê. la ma wayîrê heqî nîyê. Na dewlete ma rezîl kerd. 18 serrî yo tena no îqtîdar ma rê xirabî keno. Ma cuyêka têduşt wazenê. La ser bi serre xirab beno. Ma dewa xo ra ameyî nê cayan. Ne ersayêk ma esto, na karêk ma. Ma se bikerê? Dewe de heywanê ma estbî, herra ma estbî. Cuya ma weş bî."

	 

	Dewlete nêzana ma çi ciwîyenê'

	 

	Fatma Duman zî reaksîyon ramojna û wina va: "Werdê şarî şan de çin o ke biwerê. Gelo dewlete zana ke ez keyeyê xo de vêşana? Dewlete nêzana ke ma vêşan ê yan mirdê. Ez nêeşkena faturayê ceyranî bidî. Ez xida bigîrî yan faturayan bidî. Cuya m abi zor û zehmet derbaz bena. Ma di kesê, ma hende zehmetî ancenê. La ê bînî? Gelo yê wayîrê domanan se kenê? 18 serrî yo na dewlete seba ma çîyêk nêkerd. Yew TL  nêdayî ma. Ma her çî cêbê xo ra danê. Ma do senîn biciwîyê. Ma nan gênê zeytûnî çin ê, ma zeytûn gênê penîr çin o."

	 

	'Verê ma eşkayîne bigîrê la nika ma nêeşkenê'

	 

	Meryem Duman dîyar kerd ke xora krîz esto û her roje zem zî kenê û vat: "Faturayê ceyranî zaf yeno. La ez hende nêkena a. Mêrdeyê mi nêxebityeno. 5 domanê mi estê. Ma hetê werdî de zî îdare kenê. Dewlete seb akurdan çîyêk nêkerd. Verê qet nêbê ma eşkayîne çîyêk bigirewtêne. Nika nêeşkena bigîrî."

	 

	'Ma heme perîşan bîyê'

	 

	Makbule Denîz zî dîyar kerd ke krîzî dir betalî zî zêde bîyo û mêrdeyê aye coka nêxebityeno û wina vat: "Ma heme perîşan bîyê. Seba kar çin o, ma nêeşkenê çîyêk bigîrê. Dewlete tu hetkarî nêdana. Bi 18 serrî dewlete ra tu paştdayîş ma nêdî. Ma wazenê no hukmat bivuro."