'Şarî qeyûm nêweçînayo, raya xo nêdayo'  

2021-01-16 09:17:59


	 

	COLEMÊRG - Hemşaredara Colemêrgî Remzîye Yaşar ke qeyûm tayînê vera ci amebi kerdene, dima ra ameye tepiştene. Dayîka Remzîye, Mehsîma Yaşar wina vat: "Şarî kênaya mi weçîna. La qeyûmo ke ameyo tayînkerdene şarî raya xo nêdayo û nêweçînayo."

	 

	Weçînayîşê 31ê Adara 2019 de Geverê Colemêrgî de Remzîye Yaşar û Îrfan Sari hemşaredar ameyî weçînayîş û 6 mengî ra dima 15ê teşrîna verêne 2019 de Enqereyî de ameyî destbendkerdene û 17ê teşrîna verêne de ameyî tepiştene. Remzîye dimayê ke ameye tepiştene, surgunê zîndanê înfazî yê Cezaya Girewte yê Cinîyan ê Xarpêtî ameye kerdene. Roniştişê yewin 4ê Sibata 2020 de ame vînayene û her çiqas Yewin Dadgeha Cezaya Giran ya Colemêrgî qerarê tahlîye vejîyo zî, 2yîn Dadgeha Cezaya Giran ya Colemêrgî qerarê tahlîye xira kerd. Dayîka Remzîye, Mehsîma Yaşar derheqê tepiştişê Remzîye de qisey kerd.

	 

	'Dadgehe zî tu suc nêvînena'

	 

	Mehsîma dîyar kerd ke Remzîye serrêke û 4 mengî yo tepişte ya û vat: "Remzîye bi rayê şarî ameye weçînayîş û bî hemşaredar. Eynî dosya ra kesê ke ameyîne muhakemekerdene, heme teber de yê û kênaya mi tena tepişte ya. Ez wazena kênaya mi zî bêra veradayene. Wa teber de bêra muhakemekerdene. Dadger û dozgerî zî zanê sucê çin o. Her roniştiş de vanê ke îfadeyê şahidê nimte esto."

	 

	'Şarî qeyûm nêweçînayo'

	 

	Mehsîma tewr peyîn qiseykerdişê xo de dîyar kerd ke edelet bêtesîr mendo, no welatî de ne edalet, ne qanûn û ne zî huqûq esto. Mehsîma wina dewam kerd: "Şar qeyûm nêweçînayo. Raya xo nêdayê. Tena kesêk ameyo tayînkerdiş o. Bê sebeb roniştişan kenê û her wext taloq kenê. Gelo manaya nê çi yo? No nêheqî yo, ma nê qebûl nêkenê."

	 

	Mehsîma roniştişê Remzîye ke do 26ê Sibate de bêro kerdene, ard vîr û vengdayîşê paştdayîşî kerd ke kênaya ci bêra tehlîyekerdene.