Bi serran o awe nêdanê dewe

2021-01-15 09:24:45


	 

	WAN - Problemê awe ya dewa Yedî Kilise ya qezaya Îpekyolî ya Wanî, bi serran o dewam keno. Pêwa ke dewe seba çareserkerdişî muracatê şaredarî kenê zî problem nêame çareserkerdene, erdê ke ameyê ramitiş zî bêawe ra wişk bîyê. Cinîyî, awe meydanê dewe ra anê. Dewijî, vengdayîşê çareserîyê problemî kenê.

	 

	 Dewa Yedî Kilise ya Îpekyolî ya Wanî bi serran o  ke problemê awe ciwîyena. Dewe de 110 keyeyî ciwîyenê û welatijî awa xo hêneyê dewe ra anê. Cinîyî serê sibayî rew wirzenê û bîdonan şinê awe anê. Dewijî ke bi serran o nê problemî ciwîyenê, çareyêk nêameyo vînayene. Welatijî her roje şinê  Mudûrîyetê Pêroyî yê Îdareyê Kanalîzasyon û Awe ya Wanî (VASKÎ) cewabê 'seba herêma hezazî ya ma nêeşkenê awe bidê' danê.

	 

	'Ma awe serê tenûre de germ kenê'

	 

	Cinîya bi nameyê Gurbet Hatîm dîyar kerd ke seba serê xo yê bişon tenûre de awe germ kenê û vat: "Ma awe wareyê dewe ra anê. Ma bi xortum ra camî ra awe gênê. La zimistanî xortim cemid yeno. Ganî problemî çareser bibê."

	 

	‘Tena awe danê camî'

	 

	Mehcebîn Sihet dîyar kerd ke 30 serrî yo dewe de ciwîyena û vat, wazenê camî ra awe bigîrê la seba solê înan herre yo, melayê dewe destûr nêdano û wina va: "Heta hamnanî ma rezîl benê. Heywanî estê, ma şinê hêneyêk dûrî ra awe anê. Ma zimistanî zaf aciz benê. Her ca beno cemed. Bi 30 serrî yo ez awe ancena keyeyê xo. Dewlete çîyêk nêkena. Ma wazenê seke dewê bînan bê. Tena awe camî yena."

	 

	'Zîyanê ma wişk beno'

	 

	Nazîfe Îret zî dîyar kerd ke ekonomîya înan ramitiş ra yeno û seba ke awa ma çin a, erdê ma wişk benê û vat: "Genimê ke ma çînenê tena qîmê keyeyê ma keno. Seba ke ma nêeşkenê biroşê. Eke awe bibayîne, ma sebze zî ramitêne. Ma muracatê şaredarî kenê, bi tanker awe anê. Heywanî estê, baxçe estê, ma nêzanê se bikerê."

	 

	'Seba dewe tu xizmet çin o'

	 

	 Nazîme Çok zî wina vat: "Dimayê erdlerzê Wanî awanî bi 45 hezar TL dayî ma. Uca de zî problemê awa esto. Cana  enerjiya tavê teqya. Makîneyê cilan xira bîyo. Gelo do heta key wina bo. Wan seba xeylêk cayê nêhewce xizmet kerdene, la seba dewa ma de tu xizmet nîno kerdene."