Hûmarê enflasyonê TUÎKî reyna goreyê hesabê cinîyan nêbi 

2021-01-14 14:13:21


	 

	Gulîstan Azak

	 

	AMED - Hûmarê enflasyonê TUÎKî reyna goreyê hesabê cinîyan nêbi. Şahîbe Gerçeka ke teqawît a, dîyar kerd ke enflasyon tewr kêm di katî yê ke ameyo eşkerakerdene û no dayîş û girewtişê keno ramojneno.

	 

	Goreyê dayeyê enflasyonê menga Kanûne ya Sazgehê Îstatîstîkê Tirkîya (TUÎK), menga kanûne de enflasyon se ra 1,25 zêde bîyo, serre de zî se ra 14.60 o. La nê dayeyî goreyê hesabê cinîyê ke şinê dayîş û girewtişî yê. Cinîyê ke vejîyayîne dayîş û girewtişî   dîyar kerdi ke enflasyono ke ameyo eşkerakerdiş ê rast tewr tay di qatê ci yo.

	 

	Şahîbe Gerçeka 60 serrî bi meaşê teqawitbîyayîşî debara xo kena, her wext eynî ca de dayîş û girewtiş kena û na rey bi amancê ‘enflasyonê rast ê şarî bêmîqyas' ma zî aye dir şî. Şahîbe seba eynî berardişî ke menga teşrîna verêne de 523 lîra da, teşrîna peyêne de 558 da û kanûne de 578 da. Bi no hawayî hîrê mengê peyîn de vayîya berardişan marketan de se ra 14 û yê bazarî zî se ra 21 zêde bîyê.

	 

	'Enflasyonê ke hesab kena o ke ameyo eşkerakerdene ra tewr zêde yo' 

	 

	Şahîbe dîyar kerd ke hesabê ci TUÎKî pey xo de verda û vat: "Hesap goreyê çi yeno kerdene. Wa vajê ma zî wina bikerê. Gelo enflasyon eşkeno se ra 14,6 bo? Enflasyonê ke ez hesab kena, tewr tay di qat zêde yo. Hukmat bi zamê seba meaşê asgarî zêde kerdo, pesnê xo dano. Hîrê mengan de se ra 21 vay bîyo. Gelo şar çi şertî de dayîş û girewtişî keno. Gelo eşkenê se bikerê, wa bizanê ke poşetê înan de çi esto."

	 

	'Ez nêeşkena faturayê gazî bidî'

	 

	Şahîbe tewr peyîn wina va: "Seba ke nêeşkena faturayê gazê xozayî bidî, keyeyo cemidnaye de ronişnena. Ez nêzana bi meaşê xo fatureyan bidî, yan zî kênaya xo bidî wendiş û yan zî mitbexê xo rê mesref bikerî. Meaşê teqawîtan zî adîlane nîyo. Rewşa şarî werte de ya. Hewceyê vatişî çin o."