'Wa dayîkî destê yewbînan bigîrê û seba yewîye têkoşîn bikerê'  

2021-01-13 14:52:11


	 

	Sema Çaglak

	 

	AMED - Cinîyê ke seba yewîya neteweyî a kurdî veng kerdî û vatî ke hemverê hêrişê serê kurdan de yewîya neteweyî seke qalxan a. Wa dayîkî destê yewbînan bigîrê û seba yewîye têkoşînê xo girs bikerê.

	 

	Şarê Kurdî bi seyan serre yo seba xelaskerdişê herra xo têkoşîn kerdê. Nê het ra her wext ver axoverdayîşê înan hêriş bîyo û qirkerdişan ra derbaz bîyê. Tewr peyîn munaqeşeyê başûrê Kurdistanî yê mîyanê kurdan de şarê Kurdî keno mîyanê endîşeyan û beno sebebê rexneyan. Cinîyê kurdî vera nê vengdayîşê yewîye kerdî û vatî bes o kurdî bêrê kayê dewletê serdestan.

	 

	'Eke ma bibê yew tu hêz nêeşkeno bi ma'

	 

	Halîme Topuz dîyar kerd ke kurdî seb adewa û heqê xo wiştê serê lingan û va: "Seba ke kurdî nêbê yew, her wext dewletan mîyanê înan de têmîyanî viraşt. Tarîxê kurdan de her wext xetê tewr girîng yê îxanet û xoverdayîşî ramojnayo. Seba ke kurdî nêbîyê yew, îxanet mîyanê kurdan de hîn aaver şîyo. Eke ma bibê yew, ma do nêşêrê yew bi yew. Eke ewro roj mîyanê partîyê kurdan de yewîye bibayîne, pêro kurdan înan ra hêz bigirewtêne. Yewîya ma vera hêrişî serê ma de sey qalxan bivindertêne."

	 

	'Ma nêeşkenê tarîxê xo newe ra binusê'

	 

	Halîme dîyar kerd ke şarê Kurdî bi seyan serre yo pey xoserîya xo yê û vat: "Kurdî seba xoserbîyayîşê welatê xo surgun bî, ameyî daliqnayene, qirkerdiş dir rî bi rî mendî û her cayê vakurê Kurdistanî û Tirkîya de bi serran o zîndanan de yê. Ma azadîya herre, ziwan, kultur û tarîxê xo wazenê. Êdî ma nêwazenê bindest bimanê û dewletê bînê serê ma de bibê waîrê heqî. Ez veng dana kurdan wa êdî aya bibê û seba yewîya xo têkoşîn bikerê. Ma eşkenê tarîxê xo newe ra binusê. Wa  êdî nêrê kayê dewletan. Xora bi seyan serre yo, kurdan kayanê dewletan ra vinî kerdo. Wa na rey vinî nêkerê û biresê azadî."

	 

	'Kurdistan seba dewletan xezîneyêk o'

	 

	Halîme tewr peyîn wina va: "Kurdistan hetê ramitişî, ekonomî, çimeyê serê erdî û binê erdî, xoza û kulturî de dewlemend o. Coka Kurdistan seba dewletan sey xezîneyêk o. Tena ma eşkenê bi yewîya xo destê lêşinî serê herra xo wedarinê. Nika Rojhelato Mîyanên de krîzêk pîl esto. Tirkîya her ke şina mîyanê nê krîzî de helêna. Coka ma nê seserre de eşkenê xo rê bikerê sey îmkanêk."

	 

	'Lazim o berê Îmralî abibo'

	 

	Xezal Yildirim zî deyar kerd ke kurdî ten aaştî wazenê û va: "Ma her çar parçeyê Kurdîstanî de seba ke nêbîyê yew, bedelan danê. Wa no zulm biqedo û aştî bêro meydan. Seba nê lazim o berê Îmralî abibo. Bi no hawa domanê ma zî zîndanan ra vejîyê û seba temamê şarê Rojhelato Mîyanên hizûrêk bi ca bêro. Ma dayîkî nêwazenê mîyanê kurdan şer û pêrodayîş bibo. Wa tu hawa gonîya kurdan nêrêjo. Ganî Barzanî bi dişminê kurdan dir nêkewo îtîfaqan. Wa pêro dayîkî wirzê, destê yewbînan bigîrê û seba yewîye têkoşîn bikerê."