'Êzidîyê ke agêrenê serê herra xo do cuyêka newe awan bikerê'

2021-01-12 09:17:25


	 

	 

	 

	Nesrin Hisên - Viyan Saîd

	 

	ŞENGAL - Xeylêk keyeyê êzidî pêwa zor û zehmetîyan agêrayî bajarokê Tilizerî,  nika hewl danê ke cuyêka newe awan bikerê. Cinîyê ke tîya ciwîyenê dîyar kerdî ke nika xeylêk problemî estê la agêrayîşê êzidîyan û yewîya êzidîyan do nê probleman werte ra wedarnê.

	 

	Êzidîyê ke wargehan de ameybî bi ca kerdene, nika kom bi kome yenê serê ca û wareyê xo. Meclîsê Xoserîya Demokratîke yê Şengalî serra 2020î de vengdayîşê agêrayîşê êzidîyan kerdibi. Bi vengdayîşî xeylêk keyeyî agêrayî. 7 mengî yo bajarokê Tilizerî de kom bi kom agêrenê serê herra xo. Heta nika nêzdîyê 400 keyeyî ameyî bajarok.

	 

	Beyo Hisên û Kewê Sileman Milkoku zî kesê ke agêrayî ca û wareyê xo yê. Her di cinî nika bajarokê Tilizera Şengalî de ciwîyenê. Beyoye û Kewê ajansê ma rê qalê problemê xo kerdî.

	 

	'Herra ma pîroz a'

	 

	Beyoye, destpêk de bale ant serê zehmetîyê ke antê û va: "Ez bajarokê Tilizerê Şengalî de ciwîyena. Roja ke ma agêrayî serê herra xo heta ewro ma zehmetîya ciwîyenê. Bi 7 mengî yo ma agêrayê, la hukmatê Iraqî lazimîyê ma bi ca nêard û hetkarî nêda ma. Ma êdî nêwaştêne wargehê multecîyan de biciwîyê. Ma ewro serê herre, mal û warê xo de ciwîyenê. Herra ma cayê ma ya tewr pîroz a. Roja destpêk ra heta ewro zehmetîyê ke ma ciwîyenê xeylêk estê. Problemo tewr pîl awe ya. Ganî problemî bêrê çareserkerdiş ke şar hîna zêde agêro serê herra xo."

	 

	'Iraq ma sey hemwelatij nêvîneno'

	 

	Kewê wina qalê xo yê agêrayîşî kerd: "Dimayê ke ma wargeh ra vejîyayî, ma ameyî dewa Digurî de bi ca bî. Seba ke wareyê ma nêbi, ma verê xo da bajarokê Tilizerî. Ameyîşê ma girîng o labelê problemê ma zî estê. Awa tîya zaf lêşin a. Hukmatê Iraqî ma sey welatijê xo nêvîno û seba ma çîyêk nêkeno. Seba awankerdişê dewan, heta nika tu game nêeşto."

	 

	'Zehmetîyê ke ma ciwîyenê zaf ê'

	 

	Kewê, dewam de wina va: "Bi taybet tutê ma zî hetê wendişê zehmetîyan ciwîyenê. Heta nika mektebî nêameyî viraştiş û tutê ma nêeşkenê wendişê xo dewam bikerê. Mêrdeyê mi merdo. Gelo ez o senî tena bi sereyê xo şêrî nêweşxaneyî Şengalî. Ganî tîya nêweşxane bêro awankerdiş û doktorî bêrê wezîfedarkerdiş."

	 

	'Ganî êzidî agêrê serê herra xo'

	 

	Kewê, tewr peyîn wina va: "Ganî pêro êzidî agêrê serê herra xo. Eke komelê ma agêro serê herra xo, ma eşkenê wareyê xo awan bikerê. Teberê şaredarîya ma tu kes hetkarî nêdano ma. Şaredarî zî goreyê îmkananê destê xo, hetkarî dano. La no qîm nêkeno. Omis kena ke heme wayîr vejîyê û bêveng nêmanê. Sewnîna ez veng dana êzidîyê ke kampan de ciwîyenê û êdî agêrê serê herra xo."