Keyeyê tepişteyan: Ganî ma bibê vengê tepişteyan 

2021-01-10 14:32:39


	 

	Rojda Aydin 

	 

	ŞIRNEX - Keyeyê tepişteyan ê Şirnexî, derheqê grevê vêşanî de qisey kerdî û veng dayî raya pêroyî û vatî: "Tutê ma seba ke waştişê înan bi ca bêrê çalakî viraştî. Ganî ma bibê vengê tepişteyan û vengê tutanê xo." 

	 

	Çalakîya grevê vêşanîye ya tepişteyê ke hemverê tecrîdê serê Rayberê PKKyî Abdullah Ocalan û binpaykerdişê heqê tepişteyan ê 27ê Teşrîna peyêne de ame destpêkerdene. Nika koma 9ine grev dewam kena û grev kewt roja 45ine. Keyeyê tepişteyan, derheqê grevê vêşanîye de qisey kerdî û vatî wa waştişê tepişteyan bi ca bîyarê.

	 

	Nermîye Îvendî, ke lajêk aye Botan Îvendî Zîndanê Amedî de yo û lajê aye bîn zî Abdurrahman Îvendî zî Zîndanê Patnosê Agirî de yo. Sewbîna lajêk aye Îbrahîm Îvrendî zî qedexeyê tebervejîyayîşê kuçeyan de dinyaya xo bedilnayo. Nermîye, dîyar kerd ke şert û mercê zîndanan xeylê giran bîyo. Nermîne wina va: "Zîndan de binpaykerdişê heqan zaf zêde yo. Tutê ma her roje nê caardişan dir rî bi rî manenê. Ma wazenê nê tedayî bêrê wedaritiene. Her di tutê mi zî nêweş ê, zîndan de yenê tepiştene. Tutê ma wazenê ten ano bêhuqûqî peynî bibo. Lajê mi Botan bi 5 serrî yo bi hawayêk bêhuqûqî yeno tepiştene, nika zîndanê Amedî de yo û nêweş o. Lajê mi Abdurrahman zî bi gampole rayîra şino. Ganî no zulm û îşkence serê tepişteyan ra bêro wedaritene."

	 

	'Wa tecrîd peynî bo, waştişê înan bi ca bêro'

	 

	Nermîye, dîyar kerd ke grevê vêşanîye pêro zîndanan de vila bîyo û va: "Bi girankerdişê tecrîdî dir şert û mercê tepişteyan tewr giran û zehmet bi. Zîndanan de waştişê tutanê ma bi ca nêanê û heqê înan yenê binpaykerdene. Tecrîdo ke ewro serê serekî de giran bîyo sewbîna tesîrêk serê komel û zîndanan de zî keno. Tutê ma çend serrî yo bi hawayêk bêhuqûqî tepişte yê. Ma nê qetî qebul nêkenê. Di lajê mi tepişteyê, lajêk mi ame kiştiş û lajêk mi zî keye de nîyo. La ma reyna zî waştişê aştî û azadî kenê. Ganî keyeyê tepişteyan teber de bibê vengê tutanê xo."

	 

	'Ganî ma bibê vengê tepişteyan'

	 

	Dayîka bi nameyê Sanîya Danerî ke lajê aye Lokman Danerî 11 serrî yo tepişteye yo 40 serrî yo ceza ci rê dayê, wina va: "Lajê mi 20 rojan zîndanê Şirnexî de, 7 serrî zîndanê Sêrtî de mend û 4 serrî yo zîndanê Ordu de yeno tepiştene. Bi di serrî yo ez nêeşkena şêrî pêvînayîşê lajê xo. Serê zîndanan de teda û zordarî zêde yo. Bi girankerdişê tecrîdî dir zîndanan de rewşe giran bî. Wa waştişê tutanê ma bi ca bîyarê. Ma nêwazenê çîyêk bi tutanê ma bibo. Tutê ma semedo ke waştişê înan bi ca bêro, bedenê xo dayê ver bi vêşanî. Wa serek azad bo û no zulm serê ma ra wedarîyo. Wexto ke Leyla Guven dest bi grevê vêşanîye kerdibi, o zî dest pêkerd. O wext qirike ey ra gonî ameyîne. Sena nê weşîye ci ca de nîya. Emro qij de lajê mi ame tepiştene."

	 

	'Ma bi serran o vanê ke wa tecrîd bêro wedaritene'

	 

	Sanîya, waşt ke waştişê tutanê înan bi ca bêrê û wina va: "Tutê ma mîyanê çar dêsan de nêeşkenê çîyêk bikerê. Korona vîrus esto ma seba weşîya înan kewenê endîşe. Ma bi serran o vanê, wa tecrîd bêro wedaritene û azadî û aştî bêro welat. Ma xêrcê nê çîyêk bîn nêwazenê. Ganî kesê selahîyetdarî çimê xo abikerê û waştişê tutanê ma bi ca bîyarê."