Salîha Aydenîz: Wazenê faşîzm bi qanûnan dewam bikero 

2021-01-09 09:22:21


	 

	AMED - Hemsereka Pêroyî ya DBPyî Salîha Aydenîz sererastkerdişê qanûnî ke rayîr ver bi tayînkerdişê qeyûman seba STOyan akeno, ercna û va: "Îqtîdar bi qanûnê ke vejeno, hewl dano ke bêçareyîyê xo binimno. La êdî nêeşkeno binimno. Heto bîn ra zî wazenê ke faşîzm bi qanûnan bikerê.

	 

	‘Pêkerdişê Qanûnê Derheqê Vernîgirewtişê Fînansmanê Vilabîyayîşê Çekê Îmhayê Girseyî’ ke vernîya tayînkerdişê şaredarî û Sazgehê Komelê Sivîl (STO) akeno 27ê Teşrîna peyêne de meclîs ra derbaz bi û bi qanûn. Rewşa ke sererastkerdişê hetê serekomar Tayyîp Erdogan ra bêro tesdîqkerdene de komele û sazgehê komelê sivîl eşkenê falîyetê înan bêrê vindarneyene û sînorkerdene, heta lazim bivînê eşkenê qeyûm tayîn bikerê. Hemsereka Pêroyî ya Partîya Herêma Demokratîk (DBP) Salîha Aydenîz qanûn ercna.

	 

	‘Qesr û derûdorê ci goreyê berjewendîyê xo têgeyrenê'

	 

	Salîha dîyar kerd ke ewro feqîrî û qedexe zêde kûr bîyê û va: "Îqtîdarê AKPyî 5 serrî yo bi tifaqê MHPyî verpayê sozê ke dayo keno. Tena berjewendîyê qesr û derûdorê ci yenê fikirnayîş. Qanûnê înfazê ceza vet. Gelo çira no qanûn vet? Seba tacîzkar, tecawuzkar û kiştoxê cinîyan vejê, nê kerdî. Yê kesê ke seba fikr û fehmê xo tepişteyê nêameyî veradayene. Bi qanûnê peyîn ke ameyê vetene zî wazenê kesê ke fikrê îqtîdarî de nêbê bêveng bikerê. Bi zorê dewlete wazenê ke tedayê serê STKyan dewam bikerê. AKP-MHP bi polîtîkayê qeyûm xo dewam keno. Tu meşrûbîyayîşê qeyûmî çin o."

	 

	'Goreyê xo dewlete dîzayn keno'

	 

	Salîha îqtîdar pandemî keno sebeb û dewleta polîs awan keno û va: "Seba her kesî, her çi qedexe yo. Goreyê xo ra dewlete rê form dano ci. AKP-MHP wazeno ke sîstemê dîktatoryal awan bikero. Wazenê nê sîstemî mende bikerê, meşrû bikerê. Bi nê qanûnan heme STK, partîyê sîyasî dewre ra vejeno. Seba ke STK averşîyayîşê demokratîkbîyayîşî xebityenê. Îqtîdar zî nêwazeno ke averşîyayîşê demokrasî bibo. Eke çîyêk wina bibayîne, do vernîya STKyan nêgirewtêne."

	 

	'Wazenê bêçareserîyê xo werte ra wedarnê'

	 

	Salîha dîyar kerd ke MHP qeyûmê serê AKPyî yo û va: "Seba ke MHP vano çi AKP wina keno. Tirkîya de faşîzm bi ca ameyo. Komelî de globalbîyayîş aver şîyo. Globalbîyayîş xo mabêne cinî û camêrd, sîyasetmedaran de, şaran de ramojneno. Hewl yeno dayane ke faşîzm bi qanûnan bêro dewam kerdene. Wexto ke merdimî ewnîyenê, esas de bêçare mendê. Wazenê bi zorê dewlete zî bêçaretîyê xo werte ra wedarnê."

	 

	'Ganî heme kes vengê xo berz bikero'

	 

	Salîha tewr peyîn wina va: "Ma nimûneyê ci bi şaredariyan dî. Çira qeyûm tayînê şaredarîyan ame kerdene, seba ke goreyê îqtîdaran nêbî. Nika seba STKyan zî nê planî kenê. Îqtîdar bêvengî ra hêz gêno. Weçînayîşê 2019 de ma dî ke yewîye faşîzmî rijnena. Seba ke komel îqtîdar ra hîna xurt o. Ganî şarê Tirkîya bikewê xeta têkoşînê hempar."