Her di cinîyê ke êdî nêeşkenê nan bigîrê vengdayîşê hetkarî kerdî 

2021-01-03 15:23:15


	 

	Medya Uren 

	 

	MÊRDÎN -  Şerîfe 80 serrî ke bi tena sereyê xo ciwîyena, Sultana 77 serrî zî bi 2 tornê xo dir Qoser de mîyanê feqîrî de hewl danê ke biciwîyê. Rewşa her di cinîyê extîyarî, sewîyeya krîzê ekonomî rewrey vejeno verê çiman. Her di cinîyê ke êdî nêeşkenê nanê rojane bigîrê, vengdayîşê hetkarî kerdî.

	 

	Tirkîya de krîzê ekonomî her ke şino, pîl beno. Seke her wext kesê ke tewr zêde mexdûr benê cinî yê. Nika bi sebebê pandemî bi hezaran kesî kar ra vetî, kargehî ameyî padayîş. No çi tewr zaf rewşe xirab kerd. Herême de koçberî, bêkarî û heqdestê kêm hîna zaf welatijan mexdûr kerdo. Kesê ke hetkarîya cîrananê xo kerdêne, na rewşe de nêeşkenê çîyêk bikerê. Ma bî meymanê Şerîfe Yildirim û Sultan Damar. Her di cinî Qoserê Mêrdînî de mîyanê xizanî de hewl danê ke biciwîyê.

	 

	'Bêrê tesîrê krîzê ekonomî bivînê'

	 

	Şerîfe Yildirim (80) taxa Doneysera girêdayê qezaya Qoserê Mêrdînî de bi ten aciwîyena. Wexto ke aye ma vînena ke ma qalê krîzê ekonomî kenê, m adawetê keyeyê xo kena. Vernê de vana, bêrê keyeyê mi bivînê şima do tesîrê krîzî bivînê. Ma bî mêmana Şerîfe. Keyeyê Şerîfe tena odeyêk ra ameya meydan. Dês û erdê aye seba rutûbetî rijyayê. Şerîfe seba rutûbet bîyaye nîşanê m abido, dest dana doşekê erdî. Çîyê ke erd bî pêro şil bî û boya înan kewtebî zere.

	 

	'Nan çin o ez biwera'

	 

	Xeylêk nêweşîyê Şerîfe estê ke emrê aye zî tesîrê xo serê nêweşîya aye keno. Êdî nêeşkena lazimîyê xo rojane zî pêşwazî bikera, na rey zî feqîrîya aye hîna giran bena. Şerîfe wina qalê xo kena: "Ez tena wina nêciwîyena. Xeyl kesî sey mi ciwîyenê. Vatêne do meaşê extîyarî bidê mi. La o zî qîmê dermanê mi nêkeno. Ez pereyê îlacan bidî, yan ceyran û ê awe bidî. Gelo ez do çi borî û çi mesref bikerî. Fek rewşa keyeyê mi vera bidê, nan çin o ez biwerî."

	 

	'Qrîzî dir ma heme bêzar bî'

	 

	Wexto ke Şerîfe ra aqûbetê domananê aye pers kerd, tewr zêde xemgîn bî û wina va: "Rewşa înan mi ra cîya nîya. Bi keyeyê xo dir şinê şaristanê bînan û karê mewsîmî kenê. Seba şarî xebate kenê, quruşêk reseno înan yan ney. Keyeyê înan mi ra dûr nîyo. Ê zî eynî rewşe de yê. Bi krîzî dir ma heme mehf bî. Waştişê ma oyo ke nê rê çareyêk bêro vînayene."

	 

	3 kuflet odayêke veng de ciwîyenê

	 

	Sultan Damar (77) zî taxa Mezopotamyaya girêdayê Qoserê Mêrdînî de ciwîyena. Cîyabîyayîşê cuya Sultan ya Şukrane ra oyo ke Sultane 2 tornê xo yê ke hem sêwî û hem yêtim ê, wey kena. Keyeyê Sultane rijya yo. Bi taybet zî daşir û banyo rewşêk xirab de yê. Zereyê odayêk de qij 3 kesî ciwîyenê. Sewbîna problemê înan yê pîl esto. Ma Sultan ra pers kerd ke gelo senî xo germ kenê? Cewabê aye wina bi: "Na awanîya mi û mêrdeyê mi bi. Cêr de ma pesê ke wey kerdêne bî. Nika mêrdeyê mi, lajê mi û veyva mi merdê. Ez û tornê xo ten amendê. Ma cayê pesî xirakerd, ma darê ci veşnenê û pê xo germ kenê. Ma bi îdare xebitnenê. Seba ke ê biqedîyê, çîyêk ma biveşê çin o. Komir zî nêkeweno destê ma. Zaf vay o û ceyran zî no rengî yo."

	 

	'Ma hetkarî wazenê'

	 

	Sultana ke mexdurîyetê xo û tutan wina vana: "Ez meaşêk kêm gêna ke qîmê ma 10 rojan nêkeno. Ma bi hêvîya cîranan ciwîyenê. Belê êdî seba krîzî rewşa înan zî baş nîya û nêeşkenê hetkarîya ma bikerê. Girewtişê nanêk zî ma rê giran yeno. Hewarê ma oyo ke dest bierzê ma. Ma hetkarî wazenê. Seba feqîrî û krîz ma hew eşkenê biciwîyê."