Cinîyêka xoverdayoxe Maya Aştîye Nacîye Îke   

2021-01-02 14:41:59


	 

	COLEMÊRG - Endama Maya Aştîye Nacîye Îke, emrê xo fedayê têkoşînê aştî û azadîye kerd. Cinîyêka xoverdayoxe û adilane bî û wina zî tesîrê xo derûdorî kerdib. Heta peynî emrê xo vatêne, "Ez vêşaya wa kesêk bîn nêveşo" têkoşînê xo dewam kerd.

	 

	Endama Maya Aştîye Nacîyê Îke di serrî verê sey ewro şîye rehm. Nacîye 24 serrî Geverê Colemêrgî de mîyanê xebatê sîyasî de ca girewt. Bi xebat, hewldayîş û xoverdayîşê xo, xeylê cinîyan rê bî nimûne û rayber. Ferah Îke hem embaza aye ya û hem zî veyva aye ya, dîyar kerd ke seba aştîye têkoşîn kerda. Endama Mayanê Aştîye Besna Çogaç zî dîyar kerd ke her wext çalakîyan de rayber bî.

	 

	'Her kesî rê bî nimûne' 

	 

	Besna dîyar kerd ke Nacîye her wext rayber bî û va: "Çalakîyan de her wext vernê de bî û her kesî rê nimûne bî. Pêwa problemê aye weşîye estbî zî, fek xebata xo ra vera nêda. Seba nêweşîya xo 3 rey nêweşxane de mende. Gama ke vejîyayîne, verê xo dayîne partî. Pêvînayîşê ma yê tewr peyîn de nêweşxane de bî û mi ra va, 'ganî şima fek dewa ra vera nêdê, wayîrê partî vejîyê û fek dewa ra vera nêdê.' Ma soz da aye û ma do heta peynîyê emrê xo têkoşînê xo dewam bikerê."

	 

	'Kesêka biadil bî'

	 

	Ferahe zî dîyar kerd ke welatparêzêk bî û kesêka biadil bî û wina va: "Her wext pawitişê heq û edaletî kerdêne. Çi biqewîmyayîne, sere de Nacîye game eştêne. Şewe û roje mîyanê xebate de bî. Şîne şînan, xebatê weçînayîşî û mîtîngan. Hema domanê aye verê xo nêdabî têkoşînê tevgerê azadî, Nacîye mîyanê xebatan de bî. Seba ke domanê kesêk zî dinyaya xo nêbedilnê, her wext mîyanê hewldayîşan de bî. Seba aştî û cuyêka bi hizûr, şewe û roje xebityayîne."

	 

	'Ez veşaya wa kesêk bîn nêveşo'

	 

	Ferahe, dîyar kerd ke lajêk Nacîye pêrodayîşêk de şîyo rehm û wina va: "Dima yê ke lajê xo vinîkerd, tewr zêde bi têkoşînî dir girêdaye bî. Her wext vatêne, 'Ez veşaya, wa kesêk nêveşo.' Qetî cîyayî nêkerdêne mabêne mayanê kurd, tirk, laz û çerkezan. Ez veyva aye ya, mabêne ma de têkilîyêk wina rêze ra çinbi. Wayîrê mi vejîyayîne, sey hemray û sey kênaya xo dîne. Gama ke mîtîng bibayîne, vendayîne mi û mi zî xo dir berdêne. Çend domnaê mi qij bibayîne zî reyna vendayîne mi û vatêne, 'ez o hetkarîya to bikera.' Gama ke ma bişîne mitîng yan zî Newroze waştêne ez her wext cilê kurdewarî bidê xo ra."

	 

	'Cinîyêka xoverdayoxe bî'

	 

	Ferahe, tewr peyîn wina va: "Demê peyîn de nêweş bî, ma nêwaştêne ke bixebityê la goş nêdayîne ma û şîne tewrê xebatan bîne. Ma ra vatêne, 'Eke ez bimirî zî wa ez mîyanê xebata de bimirî.' Bi serran tedawîya kemoterapî dî. La Nacîye cinîyêke têkoşer û xoverdayoxe bî. Heta peynîya emrê xo mîyanê xebatan de bî."