'Hemverê lêşinî ma wayîrê wareyê xo vejîyê' 

2020-12-11 13:54:16


	 

	AMED - Dimayê tayînkerdişê qeyûman xizmetê ke kuçe û taxan de ameyîne kerdene, kêm bî û welatîyê taxa Sûrî rewşa bîyaye ra gerrekerdox ê û vatî: "Amed wareyê ma yo û ganî ma wayîrê şaristanê xo vejîyê."

	 

	19’ê tebaxa 2019’ de qeyûm tayînê Şaredarîyê Şaristanê Pîl yê Wan, Amed û Mêrdinî kerdî. Dimayê ke qeyûman tayînê şaredarîyan kerdî, herême de problemê pakitî vejîyayî meydan. Xeylêk kuçeyê ke verê çiman de nîyê, mîyanê lêşinî de yê. Kuçeyê ke verê çiman de yê her roje yenê pakkerdene. Nê taxan ra yew zî taxa Ben û Senî ya Sûrê Amedî ya. Taxa Ben û Senî ke bi hezar welatî ciwîyenê, pakitîyê taxe nîno kerdene. Bi taybetî welatîyê taxe Hala Kevn seba lêşinî û çop ra bêzar bîyê û rewşa bîyaye ra bi gerrekerdox ê.

	 

	'Pawitişê taxa ma çin o'

	 

	Gulnaz Alp gerrekerdoxê xo yê serê taxe de wina va: "Verê de çend rey ameyîne kuçeyan pak kerdêne. La nika nînê taxe. Ma bi xo vernîy akeyeyê xo pak kenê. Pawitişê taxa ma çin o, ma xebatkarê şaredarî tîya nêvînenê. Welatîyê taxe qasê îmkanê xo pak gênê la qûtîyê çopî pirr bîyê û hetê heywananê taxe ra yenê vilakerdene. Xora seba projeyê vurnayîşê şaristanî ke keyeyan xira kenê, vengî taxe ma ra kêm nêbenê. Ma nê vengan ra zaf aciz ê. Ma nêwazenê tîya ra şêrê. Seba ke cuya ma tîya derbaz bîya, cîranê ma tîya yê, domanê ma tîya pîl bî."

	 

	'Wayîrvejîyayîş lazim o'

	 

	Welatîya Sûrî Sayîme Tekîn dîyar kerd ke wayîrvejîyayîşê Amedî lazim o û wina va: "Taxa ma zaf lêşin a, verê de pêro kesî bendeyê selahîyetdaran nêbî. La nika nêzdîbîyayîşêk wina çin o. Xebatkarê şaredarî wezîfeyê xo bi ca nêanê. La ganî ma wayîrê şaristanê xo vejîyê. Amed wareyê ma yo û eke ma wayîr nêvejîyê kesêk zî nêvejîyeno."