Gulîstan Kiliç Koçyîgît: Grevê vêşanî alarmêk o 

2020-12-10 13:01:34


	 

	Oznur Değer 

	 

	ENQERE - Gulîstan Kiliç Koçyigit HDPyî grevê vêşanî yê hemverê tecrîdê serê Rayberê PKKyî Abdullah Ocalan û binpaykerdişê heqê zîndanan de wina va: "Hema ke grevê vêşanîye kûr nêbîyê, ganî waştişê tepişteyan hetê raya pêroyî ra wayîr bêro vejînayîş û destê kam ra çi yeno wa bikero."

	 

	Dimayê vatişê reformî yê Serekkomarê AKP'yî Tayyip Erdoganî, binpaykerdişê heqan û bêhuqûqî zêde bi. Dimayê nê vatişan mîyanê di hewteyan de bi hezaran kesî ameyî destbendkerdene. Hetêk bîn ra zî heme zîndanê herême de tepişteyê sîyasî hemverê tecrîdê serê Rayberê PKKyî Abdullah Ocalan û binpaykerdişê heqê zîndanan de 27'ê Teşrîna Peyêne de dest bi grevê vêşanîye yê bêdem û biagêrayîş kerdî.

	 

	Parlamentera Partîya Demokratîke ya Şaran  (HDP) a Mûşî Gulîstan Kiliç Koçyigit grevê vêşanîye yê zîndanan û serebûtê rojane erjna.

	 

	'Roja ewil ra hemverê Birêz Ocalanî de polîtîkayêk tecrîdî esto'

	 

	Gulîstane dîyar kerd ke tecrîdê Îmralî, binpaykerdişê heqê zîndanan, teda û îşkenceyo sîstematîk şexsê AKPyî ramojneno û wina va: "Welatêk de seba standartê demokrasî bêrê famkerdene, îhlalkerdişê heqan de zîndananê ey welatî temaşe bike. Tecrîdo ke yeno kerdene sîstematîk o. Pêkerdişê MHP, Ergenekon û AKPyî hemverê şarê Kurdî yo. Coka dest danê serê destkewtişê Kurdan. Vera  ke AKP problemê kurdan bi metodê demokratîk çareser bikero, tevgerê sîyasî yê kurd, destkewtişê kurdan wazeno berteraf bikero. Coka tecrîdê serê Birêz Ocalanî zî dewam keno. Dewlete dimayê çalakîyê grevê vêşanîye yê bi rayberîya Hemsereka KCDyî Leyla Guven ame destpêkerdene, verda ke Birêz Ocalan û avûkatê ci pêvînayîş bikerê la dima ra no reyna ame astengkerdene. Bi nê pêvînayîşê bi sînor, dewlete waşt ke proses wina peynî bikera. Îqtîdarê  AKPyî, Birêz Ocalanî seke 'rehîne' tepişto û mesaj dano: 'Ez gama ke biwaza ez o verdî pêvînayîş bikero,  demo ke ez nêwazî zî ez nêverdana. Ez qanûn û huqûq nas nêkena.' "

	 

	'Heqê şarê Kurdî nêvîneno'

	 

	Gulîstane dîyar kerd ke gama ke merdim no welatî de vajo, 'ez muxalîf a, HDP'yî ya, Kurd a, Elewî ya, cinî ya' nê çî yenê krîmînalîzekerdene. Tecrîdê serê Birêz Ocalanî bêhuqûqî yo. Coka ma bi hawayêk bi hêz hemverê nê nêvejênê, coka nêheqîyê û bêhuqûqî yê bîn rî danê. Hemverê      binpaykerdiş û tecrîdê serê Birêz Ocalanî de vernê de tepişteyî reaksîyon ramojnenê. Nika grevê vêşanîye dewam kenê. No alarmêk o. Hema ke grevê vêşanîye kûr nêbîyê, ganî waştişê hetê raya pêroyî ra wayîr bêro vejîyayîş û her kes çi destê înan ra bêro wa bikerê. Dimayê vatişê reformî yê Serekkomarê AKP'yî Tayyip Erdoganî, binpaykerdişê heqan ê welatî de hîna zêde bî. Dimayê nê vatişan, mîyanê di hewteyan de bi hezaran kesî ameyî destbendkerdene. No reform nîyo, no xapênayîş û manîpîlasyon o."

	 

	'Bingeyê probleman nêçareserkerdişê problemê kurdan o'

	 

	Gulistane bale ant ser bingeyê problemê kurdan û wina va: "Seba ke AKP polîtikayê şîdet, şer seba problemê kurdî vejeno dewre, welat de zî malîyetê ekonomî, sîyasî û komelî vejeno vernê. Tirkîya êdî ê  malîyetî nêeşkena wedarna. Hetêk AKPyî zî seba krîzê ekonomî û komelî ra nêrazî yê la hîn het zî tewr zêde hetê MHPyî gêno. Hîn hetê AKPyî anê ziwan ke AKP êdî AKPyê verên nîyo, MHP yo û nê rê îtiraz kenê. Mîyanê înan de krîzo ke nêeşkenê ray berê esto. No krîz zî tesîrê xo serê pêro komelî de keno. Nika Tirkîya kaotîkê tewr kurî yê tarîxî de ya. Dewa Biroxa Colemêrgî de Ozcan Erbaş ame qetilkerdene. Wexto ke Kurdî heqê xo wazenê, yenê kiştene. Binpaykerdişê heq û cuye nika ameyo sewîyeyêk bi xof. Nika hukmat bi hawayêk eşkera kurdan kişeno. Merdiş û îşkence zî meşrû keno."

	 

	'Versucê kesê ke ameyê qetilkerdene bêceza yenê verdene'

	 

	Gulîstane dîyar kerd ke polîtikayê bêcezaverdayîşî yenê bicaardene û wina va: "Muhammed û Furkan, Şirnex de mîyanê lîvînanê xo de bî, hetê panzêre ra ameyî kiştene. Xeylêk hedîseyê nê rengî de estê. Versucê kesê ke ameyê qetilkerdene, bêceza verdayî. Hezê kolukî yê dewlete gama ke kurdan kişenê, vera ke bêrê cezakerdene, xeylêk rey terfî kenê. No zî yeno a mana ke heqê welatîbîyayîşê yê kurdan hetê AKP û MHPyî ra nîno qebulkerdene. Ma nê çî qebul nêkenê û ma vanê, do têkoşînê m ahemverê nê çî dewam bikero. Kurdî, ça benê wa bibê ganî çarçewaya yewîya neteweyî de verê yewbînan de bê. Bêrê m abibê yew û hemverê qirkerdişê seserra 21êne de bigîrê."