Dewa Heştan bi destê cinîyan reyke bîn zergûn bî 

2020-12-09 14:30:38


	 

	Rojda Aydin

	 

	ŞIRNEX - Dewa Heştan a Şirnexî ke serra 1992 de hetê dewlete ra ameye veşnayene û wêrankerdene, reyke bîn bi destê cinîyan zergûn bî. Şîrîn Erkul, qal kerd ke kar û barê dewe pêro serê milê cinîyan de yo û wina va: "Her çiqas ke kar pêro serê milê cinîyan de bo zî ma fek dewa xo ra vera nêdanê û herra ma seba ma pîroz a."

	 

	Dewa Heştanî ya Şirnexî ke qilê Koyê Cudî de ya, yew dewa ke serrê 90an de hetê dewlete ra ameya veşnayene û wêrankerdene. Hemwelatîyê dewe mecbûr mendîbî ke herra xo terk bikerê û koç bikerê. Welatîyê dewa Heşatanî serra 92 de mecbûr mendî ke dewa xo ra koçê qezaya Cizîrî bikerê. Welatî dimayê 15 serrî ra dima reyke bîn verê xo dayî dewa xo. Dewijê ke verê xo dayî dewe seba ke dewlete dewa înan wêran kerdib, bi zahmetiyan re rûbirû man. Lê li gel van zahmetîyan dir rî bi rî mendî la fek dewa xo ra vera nêdayî. Şîrîne Erkul (42) a dayîka 11 domanan, serê zehmetîyê cuye de ercnayîş kerd.

	 

	Şîrîne dîyar kerd ke serra 92 de dewa înan dimayê ke hetê dewlete ra ameye veşnayene, cuyêka zor û zehmet ciwîyayê û va: "Dimayê 15 serran dima ma Cizîr ra reyke bîn ameyî dewa xo. Seba ke ma nêeşkayîne herra xo ra dûr biciwîyê. Mîyanê nê 15 serran de ma zaf zor û zehmetî ant. Wexto ke ma şî Cizîr, keyeyê ma çinbi û ma keyeyê kîra de mendî. Xêrcê nê o wext zî Cizîr de şer estbi. Merdimî ameyîne kiştene û tepiştene. Çîyê ke ma dî tu kesî nêdî. Wexto ke dewa ma ameye veşnayene, şewe bî. Serê sibayî ma verê xo da ko û deştan. Dima ra ma derbazê Cizîr bî."

	 

	'Ma dewa xo newe ra awan kerd'

	 

	Şîrîne dewam de wina va: "Gama ke ma agêrayî dewe ne keye û ne zî erdê ma mendibî. Heme ameybî wêrankerdene û talankerdene. Tu çîyêk nêverdabî. Ma nêzdîyê di serrî koxan de mendî. Dima r ama keyeyê xo viraşt, ma ameyî keyeyê xo. Ma reyn adest bi weykerdişê heywanan kerd. Ma newe ra baxçe zergûn kerd û daran dayî ro. Eke ewro dewa ma hende weş a, sebebê ci ma yê. Dewe de nika darê garcîn, kizwan, hinar, miro û xeylêk darê bîn yê fêkîyan estê. Sewbîna ma sebze zî ramnenê."

	 

	'Berardişê pêro çîyan cinîyî kenê'

	 

	Şîrîne, dîyar kerd ke dewa înan newe ra gane bîya û wina va: "Cuya ma dewijan nika zaf weş a. Ma êdî fek herra xo ra vera nêdanê û nêşêrê cayêk bîn. Ma serê siba rew wirzenê, şinê mangayanê xo ancenê. Şitê ke ana kena mast û penîr. Ma reyan zî roşenê. Zimistan û hamnanî ma cinî, heywanan wey kenê. Weykerdişê heywanan zehmet o. Barê dewe pêro milê cinîyan de yo. Pêro çîyê ma xozayî yo. Ma sebze û fêkîyê ke arêdanê ma hem xo rê wedarnenê û hem z î roşenê û pê debara xo kenê. Zimistanî cuya tîya zehmet derbaz bena. La reyna zî cuya dewe, şaristanî tewr weş a."

	 

	'Dewlete hêrişê dewe û xozaya ma kena'

	 

	Şîrîne, bale ant serê veşnayîşê daristanan û wina va: "Dewlete hema zî hêrişê dewe û xozaya ma kena. Dewlete darê ma yê fêkîyan, baxçe û zîyanê ma ameyî veşnayene. Darê ma yê kizwan û garcînan heme veşnayî û birnayî. Bi veşnayîşê daristanî wazenê ke reyke bîn ma koçber bikerê. La m afek dewa xo ra vera nêdanê. Ma wayîrê dewe û xozaya xo vejênê. Herra ma seba ma pîroz a."