Rewşa weşîya Rojbîn Çetîn tehluke de ya 

2020-12-08 13:35:43


	 

	WAN - Aktîvîsta TJAyî Sevîle Rojbîn Çetîn Amed de rastê îşkenceyêk xidar amebî, 12 rojî destbendkerde mendebî û dima ra zî tepişnayî. Bi sebebê vîrusa koronayî Rojbîne nîna tedawîkerdene. Dayîka Rojbîne, Refîka Çetîn reaksîyon vera rewşe da û va: "Rewşa aye tehluke de ya û ganî bêra tedawîkerdene. Seba tedawî zî ganî serbest bêra veradayene."

	 

	Aktîvîsta Tevgerê Cinîyê Azad (TJA) û endama Heyetê Îdarekarîya Herême Sevîl Rojbîn Çetîn 26ê hezîrane de Amed de sereştişê keyeyî de 3 saetan bi îşkenceyêk xidarî dir rî bi rî mendebî. Bi avûkate dir îşkenceyêk ci rê amebi kerdene, raya pêroyî dir amebi eşkerakerdene. Rojbîne 12 rojan destbendkerde mende û dimayê ke vejîya dadgehe zî ameye tepiştene û aye erşawitî Zîndanê Padaye yê  Tîpê E yê Mêrdînî. Rojbîne, 6 mengî yo bi problem weşîye dir rî bi rî ya. Seba ke vîrusê koronayî sebeb yeno ramojnayene, Rojbîne nîna tedawîkerdene. Dayîka Rojbîne, Refîka Çetîn endîşeyê xo ajansê ma rê qal kerd û vengdayîşê serbestveradayîşê pêro tepişteyan kerd.

	 

	'Lazim o kolonoskopî bêro kerdene'

	 

	Birayê Rojbîne û doktor Erman Çetîn bale ant serê nêweşîya Rojbîne û va: “Rewşa Rojbîne baş nîya û 6 mengî yo gonî bin ra şina. No çî bi xo dir rîskê kanserî roqelayan zî ano. Ganî seba nêweşîyêk winasî kolonoskopî bêro kerdene. Hema nêamebî tepiştene, tedawîya aye biameyîne kerdene. Seba kolonoskopî ganî biameyîne Êlih, la ameye tepiştene. Nika Rojbîne dermanê bêgonî û asinî xebitnenê. Ganî kolonoskopî bêro kerdene."

	 

	'Ganî tepişteyê nêweş bêrê tedawîkerdene'

	 

	Dayîka Rojbîne, Refîka Çetîne qiseykerdişê xo de bale ant serê rewşa tepişteyan û va: "Tedawîkerdişê tepişteyê nêweşan bi tu hawayî nîno qebulkerdene. Ganî nêweşî bêrê tedawîkerdene. Mi bi rayîrê telefonî kênaya xo dir qisey kerd û aye va, 'seb aşubeyê koronayî ma nêbenê nêweşxane. Ma bi problemê weşîye dir rî bi rî yê.' Tena reyke kênaya mi berdê nêweşxane. Kênaya mi seba derbe çimê xo ra girewt, nika problemê vînayîşî ciwîyena. Eke nêro tedawîkerdene do rewşa aye bikewo tehluke. Şert û mercê zîndanî zaf xirab o. Ez cuya kênaya xo ra endîşeyîn a."

	 

	'Domanê ma bêsuc ê'

	 

	Refîka, dîyar kerd ke 14 rojan binê karantîna de bi tena sereyê xo mende û wina va: "Ma qetî nêzdîbîyayîşêk winasî hemverê tepişteyan û keyeyê tepişteyan qebul nêkenê. Dewlete kiştox û tecawuzkerdoxê cinî û domanan serbest vera dana, la kesê ke heqê merdiman pawenê zî zîndanan de manenê. Eke tepişteyî nêweşxaneyan de dinyaya xo bi bedelnê, gelo do dewlete çi cewab bido dayîkan? Domanê ma bêsuc ê. Seba ke domanê ma heqê merdiman pawenê, nînê veradayîş. Ma vengdayîşê serbestveradayîşê domananê xo kenê."