Feleknas Uca: Ma nêwazenê tu hêzê Kurdî xismetê dişminî bikerê  

2020-12-07 14:25:49


	 

	AMED - Parlementera HDPyî ya Êlîhî Feleknase Uca bale ant serê hedîseyê Herêma Federal a Kurdistanî û va: "Amancê dişmin eşkera yo, la lazim o ke ma vernîya nê amancî bigîrê. Ma nêwazenê tu hêzêk Kurdan xizmetê dişmin bikero."

	 

	Alozîyê Herêma Federal a Kurdistanî mîyanê Kurdan de bîyo babeta munaqeşeyî. Xeylêk sazgeh û dezgehê kurdan seba caardişê yewîya neteweyî veng danê û roj bi roje vindertişê xo yê seba yewîye dîyar kenê. Rojê vîyarte de bi rayberîya Partîya Herêmê Demokratîk (DBP) û bi tewrbîyayîşê xeylêk partîyanê bînan yê sîyasî Amed de Kuçeyê Hunerî yê taxa Ofîsê Yenîşehirî de derheqê averşîyayîşê Herêma Federal a Kurdistanî de eşkerayî amebî dayene û reyke bîn seba yewîya neteweyî ya kurdî vengdayîş amebi kerdene. Derheqê babete de Parlementera Partîya Demokratîke ya Şaran (HDP) ya Êlîhî Feleknas Uca ercnayîş kerd.

	 

	'Ma nêwazenê tu hêzê Kurdî xizmetê dişminî bikerê' 

	 

	Feleknase dîyar kerd ke şarê Kurdî tarîxê xo de xeylê dej antê û va: "Dişminê kurdan se serra zêdeyêr o hêrişê çar parçeyê Kurdistanî kenê. Dişmin bi nê hêrişê xo kurdan wareyê fikrî de zî yewbînan ra parçe kerdo. Destkewtişê Kurdan mîyanê xo de pare kerdo. Serê na coxrafyaya Kurdistanî ke mîyanê xo de pare kerdê, dişminîyê tewr pîl kenê. Dişminê kurdan senîn ke bi pêameyîşê Lozanî Kurdistan kerdî 4 parçe, ewro zî wazenê ke kurdan bikerê 10 parçe. Coka destkewtişê kurdan binê tehluke de yê û wazenê ke goreyê berjewendîyê xo kurdan rayberê. Nê munaqeşeyî bi nê rengî k eyenê kerdene, nînê qebulkerdene. Seba ke şarê Kurdî tarîxê xo de xeylê dej antê. Tu wext şarê Kurdî şerêk mîyanî qebul nêkerdê. Coka bi taybet partîyê kurdistanî û şarê Kurd hemverê nê vindertişî vejîyê û nêrê kayê dişminan. Amancê dişimin eşkera yo la lazim o ke ma vernîya amancê înan bigîrê. Şerê mîyanî nîno qebulkerdene û seba ma xîyanet o. Ma nêwazenê tu hêzê kurdî, xizmetê dişmin bikero."

	 

	'Wext wextê azadîye yo' 

	 

	Feleknase dewam de win ava: "Hem Rojawan, hem Şengal û hem zî vakurê Kurdistanî de bi babeta qeyûman, hêrişê destkewtişê kurdan kenê. Roj bi roje îşxalkerdişê cografyaya başûrê Kurdistanî tewr zêde beno. Dewleta tirkî herême de xeylê cayan hêzê xo yê leşkerî bi ca kerda. Ma nê hêzê leşkerî Rojawan; Kobanê,  Serêkanî û Mexmûr û Şengal de zî dî. No hêz ewro vakurê Kurdistanî de zî destkewtişê ke ameybî bidestkerdene, wazenê çin bikerê. Sîstemê hemserekî şexsê cinîyan de binê tehluke de yo. Hemverê nê ganî kurdî se bikerê? Lazim o ma serê nê de zî vinderê. Ganî Kurdî rayîr nêdê hêrişanê winasî. Bi şerê mîyanî de ten anêwazenê di hêzê kurdan çin bikerê, raştî de wazenê bîyayîşê Kurdistanî çin bikerê. Coka ê ke zirar bivînê do destkewtişê şarê Kurdî bê. Yê ke hemverê nê hêrişan vindero zî Kurd ê. Ma sey DBPyî Amed de mesajê xo da. Ma rayîr nêdanê şerêk mîyanî ke bêro meydan û ma do seba nê têkoşînê xo dewam bikerê. Ganî m axizmetê dişminî nêkerê. Ewro dem demê azadîya şarê Kurdî yo."

	 

	'Ma do xebatanê xo yê seba yewîye dewam bikerê'

	 

	Feleknase dîyar kerd ke seba yewîya neteweyî xebatê xo dewam kenê û va: "Ma başûrê Kurdistanî de zî xeylêlk pêvînayîş kerd û seba yewîya neteweyî xebatî kerdî. Ma ewro zî vanê, seba caardişê yewîya neteweyî ganî berjewendîyê şarê Kurdî esas bêrê girewtene. Bi berjewendîyê parçeyêk yena yewîye mumkin nîya. Ma yewîya cinîyanê kurdî zî da awankerdene. Bi rayberîya cinîyan ma wazenê ke xebatê seba yewîye tewr hîra bikerê. Ma do rayîr nêdê ke dişminê kurdan serê ameyoxê kurdan de qerar bidê. Coka dermanê dejê kurdan yewîya neteweyî yo. Eke tifaqê ma bibo, ma eşkenê destkewtişê şarê Kurdî, her çar parçeyê Kurdistanî de zî bipawê. Ma vînenê ke roj bi roje sîyasetê çinkerdişê serê kurdan yeno bicaardene. Roj bi roje kurdî ver bi helinayîşî şinê.  Roj bi roje deskewtişê ma destê ma ra şinê. Ma nêeşkenê vajê ke ewro şerê mendiş û nêmendişî yo. Yan ma do pîya serkewte bê, yan zî m ado vinî bikerê. Ma seba berjewendîyê parçeyêk nêeşkenê berjewendîyê parçeyê bîn bêrê. Verpayê ci do qirkerdiş û ferman serê ma de dewam bikerê."

	 

	'Ganî ma kayanê înan veng vejê'

	 

	Feleknase eynî wextî de bale ant serê pêkerdişê Şengalî zî ke mabêne Iraq û hukmatê herême de ame îmzakerdene û va: "Nê pêkerdişî de îradeyê welatîyê Şengalijan ca nêgirewt û yeno famkerdene ke qerarêk sîyasî yo. Serê Şengalî de xeylêk plan û proje yenê amadekerdene. Eke Şengal şêro do Rojawan zî şêro, Hewlêr û Silemanî zî şêro. Coka lazim o ma bêveng nêmanê û plan û kayê Amerîka û Tirkîya veng vejê."