
'Îrade û têkoşînê cinîyan hedef yeno girewtene' 

2020-12-06 15:26:14


	&nbsp;

	ŞIRNEX - Hemsereka HDPyî ya qezaya Hezexî Nafîye Geçgel ya ke 4 rojan desbendkerde mende, dîyar kerd ke sereştişê keyeyî de lajê ci zaf tersayo û va: "Îrade û têkoşînê cinîyan hedef ameyo girewtene. Wazenê îradeyê cinî desteser bikerê. La ma do hemverê nê hêrişan têkoşîn û xoverdayîşê xo tewr xurt bikerê."

	&nbsp;

	Hetê Serdozgerîya Komara Şirnexî ra çarçewaya cipersayîşî hemverê Kongreya Komela Demokratîke (KCD) de operasyon ame destpêkerdene û sereştişê xeylê keyan ame kerdene. Sereştişê keyan de hemşaradara Cizîrî ke vera ci qeyûm ame tayînkerdene Bêrîvane Kutlu, Hemseroka HDPyî ya qexzaya Hezexî Nafîye Geçgel zî mîyan de, bi temamî 23 kesî ameybî destbendkerdene. 23 kesan ra yew seba ke testê ci pozîtîf vejîya, yeno/a tedawîkerdene. Dimayê cipersayîşî ra 19 kesî bi şertê kontrolê edlî serbest ameyî veradayene û 3 kesî zî ameyî tepiştene.

	&nbsp;

	Hemsereka HDPyî ya qezaya Hezexî Nafîye Geçgela ke 4 rojî destbendkerde mende, derheqê destbendkerdiş û tepiştişan de ercnayîş kerd.

	&nbsp;

	'Psîkolojîyê domananê ma xira beno'

	&nbsp;

	Nafîye, dîayr kerd ke polîsan serê siba rew eşto serê keyeyî û wina va: "Bi xidarîyêk pîl eştî serê keyeyanê ma. Vatî erd de derg bê, la mi sey înan nêkerd. Tay mendib pay bidê serê domanê min ê 5 serrî û mi ey verê lingan ra xelas kerd. Sereştişê keyeyan de tewr zêde domanî tesîr benê. Domanê mi zaf tersayî. Psîkoljîyê domanan xira beno. Eke veng bidê ma hewce nêkeno bierzê serê keyeyê ma, xora ma do şêrê îfade bidê."

	&nbsp;

	'Wazenê îradeyê cinîyan desteser bikerê'

	&nbsp;

	Nafîye tewr peyîn wina va: "Îqtîdar, bi serran o hemverê kurdan hêrişanê xo dewam keno. Îqtîdar ke serranê 90yî ra heta nika wehşetî keno, wazeno ke kurdan çin bikero. Coka zî bi nê destbendkerdiş û tepiştişan bitersnê. Labelê ma hêrişan ra nêtersenê. Her ke şino, ma tewr zêde bihêz benê. Wazenê îradeyê cinîyan desteser bikerê. La ma do hemverê nê hêrişan têkoşînê xurt bikerê. Ma cinî hemverê zulm û dişminî sere wedarinenê. Ma do xoverdayîşê dewam bikerê. Ma do vengê xo her ware de berz bikerê. Ganî tu kes hemverê nê hêrişan, bêveng nêmano."

	&nbsp;