Remzîye Tosun: Pêwa hêrişan nêeşkayîne îradeyê Sûrî bişiknê 

2020-12-04 14:09:11


	 

	AMED - Serê qedexeyê tebervejîyayîşê kuçeyan ê Sûrî ra 5 serrî derbaz bi, parlementera HDPyî ya Amedî Remzîye Tosun, şahidiyê qedexeyê Sûrî kerdib wina va: "Îqtîdar heme hacetê destê xo Sûr de xebitna. Pêwa nê çîyan, nêeşkayî îradeyê şarî bişiknê. Seba ke şar ê têkoşînê bêhempa de vindertişêk komûnal ramojna."

	 

	Vernîya 7’ê hezîrana  2015 de şaristanê herême û Tirkîya de hemverê şarê Kurdî û Partîya Demokratîke ya Şaran (HDP) hêrişê topyekûn ameyî destpêkerdene. Dimayê ke prosesê çareserî yê mîyanê serrê 2013-2015 de hetê AKPyî ra ame qedênayîş, 14’ê tebaxe de Sûr û xeylêk şaristanê ke rayberîyê Meclîsê Şarî ra “Îdarekarîya xoser” ame îlankerdene. Hemverê îdarekarîyê şarî dewlete 14’ê tebaxe de hêrişêk pîl kerd. Qezaya Sûrî zî 2’yê kanûne de qedexeyê tebervejîyayîşê kuçeyan ame îlankerdene. Prosesê qedexeyî de seba hêrişan bi desan kesî dinyaya xo bedilnayî. Xeylê keyeyî û awanîyê tarîxî ameyî rijnayene.

	 

	Serê qedexeyê tebervejîyayîşê kuçeyan ê Sûrî ra 5 serrî derbaz bi. La hema zî cenazeyê ke nêameyê vînayene estê. Hîn kuçeyê ke dekewtişê înan qedexe yo estê. Parlementera Partîya Demokratîke ya Şaran (HDP) ya Amedî Remzîye Tosun zî roja 96î de bi domananê xo dir Sûr ra vejîya. Remzîye 15 mengî zîndan de mende. Remzîye ke şahidiyê qedexeyê Sûrî kerdebî serrgerê ci de ajansê ma rê qal kerd.

	 

	'Îqtîdar nêresa amancê xo'

	 

	Remzîye bale ant serê vîrardişanê xo yê 5 serrî verê û wina va: "Îqtîdar, netîceyê weçînayîşê 7’ê Hezîrane qebûl nêkerd. Rêxistinê ciwanan hemverê hêrsê îqtîdarî ra çalakîyê nobete dabî destpêkerdene. Tu wext vengê welatîyê Sûrî nêame goşdarkerdene. 28’ê teşrîna peyêne dimayê qetilkerdişê Tahîr Elçî, sewîyeya hêrişan her ke şino tewr zêde beno. Seke serrê 90an kiştoxê Tahîr Elçî zî meçhûl mend. La ma eşkenê vajê ke îqtîdar qetî nêeşka bireso maancê xo. Her çiqas tewirê hêrişê xo zî bivurno, do qetî serkewte nêbo."

	 

	'Pêwa hêrişan nêeşkayî xoverdayîş biqedênê'

	 

	Remzîye dîyar kerd ke 96 rojan Sûrî de xoverdayîşêk bi û va: "130 rojî qedexeyê tebervejîyayîşê kuçeyan bi la hetê hukmatî ra 103 rojî ame neqlkerdene. Netîceyê hêrişê 130 rojan de Sûr nêkewt destê îqtîdarî. Seba ke hemverê nê hêrişî îrade û hêzê welatîyê Sûrî bi. Seranserê dinya de bombayê mîsketî qedexe yê, la hetê polîsê Dewleta Tirkî ra ame xebitnayene. Îqtîdar heme çîyê destê xo Sûr de xebitna. Pêwa nê çîyan, nêeşka nê xoverdayîşî biqedêno. Seba ke têkoşînê bêhempa de seknêke komûnal ramojna.  Ez çiqas nê çîyan bîyarî ziwan zî ez nêeşkena temamê xoverdayîşî bîyarî ziwan."

	 

	'Dewlete xonaskerdişê şarî ra tersa'

	 

	Remzîye dewam de wina va: "Çimeyê serewedaritişê ciwananê Sûrî seba îdarekarîyê xoser bi. Îdarekarîyê xoser ke parçeyêk xo rayîrberdiş o hetê şarî ra pozîtîf ame pêşwazîkerdene û coka îqtîdar hende hêrişî kerd. Seba ke dewlete xonaskerdişê şarê Kurdî ra tersa. Eke şar xo nas bikero, do heqê xo nas bikero. Şar seba heqanê xo berdelê pîlî dayî."

	 

	'Polîtîkayê xo dewam kenê'

	 

	Remzîye dîyar kerd ke polîtîkayê ke Sûr de ameyî kerdene, hema zî wazenê dewam bikerê û win ava: "Bi polîtîkayê şerê taybet yeno waştene ke îradeyê şarî bişiknê. Coka polîtîkayê qirkerdişî yenê kerdene. Nika zî polîtîkayê ke Sûr de yenê kerdene, wazenê ke heme cayan de bi ca bîyarê. Eştişê welatîyan ê helîkopterî û Mûsa Orhano ke tecawuzê Îpeke Er kerd û bi sebebê kiştişê aye nimûneyê verê çimanî yo."