Çeteleyê Şîdetî yê Teşrîna Peyêne: Camêrdan 30 cinîyî qetil kerdî 2020-12-03 16:57:32   Dilan Babat   MERKEZÊ XEBERAN - Goreyê çeteleyê şîdetê ke ma çapemenî ra amade kerd, camêrdan tewr tay 30 cinî qetil kerdî. 8 cinî bi hawayêk bi guman dinyaya xo bedilnayî û 11 cinî zî ameyî waşetene ke bêrê qetilkerdene. Sewbîna 2 domanî ameyî qetilkerdene.   Her menge hûmara qetilkerdişê cinîyan zêde beno û selahîyetdarê hukmatî zî vera ke serê polîtikayê bêcezaverdayîşî de vinderê, bernameyê ke beşdar benê de têkoşînê cinîyan hedef gênê. Sewbîna tewr peyîn Wezîrê Karê Zereyî Suleyman Soylu çarçewaya 25'ê Teşrîna Peyêne Roja Têkoşînê Hemverê Şîdetê Serê Cinîyan de tewrê çalakîyêk bibi û çalakî de wina vatib: "Na mesela bi nuştişê di sloganê serê tabelayî de çareser nêbena." Nê dir reyna ame vînayene ke qirkerdiş û şîdetê hemverê cinîyan nêvîneno. Na menga 25'ê teşrîna peyêne de cinîyan her ware de reaksîyon hemverê şîdetî ramojna. Îqtidar zî cinîyê ke 25'ê teşrîna peyêne de vejîyayî wareyan, bi hepiskerdişê keyeyî û durfistişê wareyan ceza kerd. Labelê cinî hemverê heme tedayan emsar zî vejîyayî meydanan û hemverê şîdetî camêr-dewlete de vengê xo berz kerdî.   Nê serdemî Virusê Koronayî (Covid-19) zêde bîyo de nîmeyê cinîyê ke ameyî qetilkerdene, keyeyê xo de ameyî qetilkerdene. Xeylê cinî karê xo de û xeylê zî verê berê edlîye de ameyî qetilkerdene.   30 cinî ameyî qetilkerdene   Platforma Ma do Cînayetê Cinîyan Vindarnê (KCDP) menga teşrîna peyêne de 29 cinî ameyî qetilkerdene û 10 cinî zî bi hawayêk bi guman dinyaya xo bedilnayî. Goreyê dayeyê ma zî na menge de tewr tay 30 cinî hetê nasanê xo ra ameyî qetilkerdene û 8 cinî bi hawayêk bi guman dinyaya xo bedilnayî. Cinîyêke ameye kiştene, hem aversûcê ci nêameyo vînayene û 11 cinî zî ameyî waştene ke bêrê qetilkerdene. Tewr tay desteştişê 6 cinîyan ame kerdene û rastê tecawuzî ameyî. Hukmî zî fek polîtîkayê xo yê bêcezaverdayîşî vera nêda.   Îzmîr de 4 cinî ameyî qetilkerdene    Na menge Îzmîr de mîyanê şarsitanê ke tewr zaf cinîyê ameyî qetilkerdene de cayê xo girewt. Îzmîr de na menge 4 cinî, Mêrsîn de 2 cinî ameyî qetilkerdene û cinîyêke zî ameye waştene bêra qetilkerdene. Hema hema her şaristanê Tirkîya de cinî ameyî qetilkerdene. Cinî seba ke xo bipawê, têkoşîn kenê. Bursa de Îsmaîl I. waşt ke embaza xo Zehra Y. bi çek qetil bikero. Zehraya ke bi hawayêk birîndar bi şîdetî dir rî bi rî ameye verdayene, xopawitişê meşrû kerd û Îsmaîl I. kişt.     Camêrdê bi unîforma 5 cinî qetil kerdî   Reyna na menge de camêrdê bi unîforma cinîyan qetil kerdî. Na menge de çawişê pispor, berbaz û qorîcîyan 5 cinî qetil kerd.