Dosyaya Fatma de tu averşîyayîş çin o

2020-12-03 16:08:14


	 

	Dîlan Babat

	 

	WAN -  Fatma Altinmakas, Milazgir de ameye kiştene û heta nika îdîanameyê ci nêameyo amadekerdene û dosya de tu averşîyayîş çin o.

	 

	Fatma Altinmakasa ke dewa Qêranlî ya qezaya Milazgirê Mûşî de ciwîyena, 14’ê temmuze de hetê camêrdê ke ci dir zewicnayebî Kazim  Altinmakas ra ameye kiştene. Sewbîna Fatma xeylêk rey reyan rastê tecawuzê birayê Kazim Altinmakasî, Sînan Altinmakasî ameya û ameya tehdîdkerdene. Tehqîqato ke derheqê kiştişê Fatma de ame destpêkerdene de hema nêameyo temamkerdene. 4 û nîm mengî yo cigêrayîş yeno kerdene la nîno zanayene ke do key îdîaname bêro amadekerdene.

	 

	Avûkatê Fatma û eynî wextî de birayê aye Mîr Bedîrhan Ayaz derheqê serbestveradayîşê tecawuzkar Sînanî de muracatê Dadgerîya Cezaya Sulhî ya Panosî kerd û îtîrazê serbestveradayîşê ci kerd. La heta nika derheqê îtîrazî de zî tu cewab nêameyo dayene. Sewbîna avûkat Mîr Bedîrhan waşt ke îfadeyê birayê pîl yê Kazim û Sinan zî bêrê girewtene, la derheqê babete de zî heta nika cewabêk nêameyo dayene.

	 

	Fatma derheqê tecawuzî de 12 temmuze de Qereqolê Cendermeyan ê Konakkuranî de muracatê sucî kerdebî. Dimayê gerreyê Fatma, Sînan yeno destbendkerdene, la hetê dadgehe ra bi sebebê ke îqametgehê ci dîyar nîyo û nêeşkeno delîlan werte ra wedarno, bi qerarê şertê kontrolê edlî Sînan serbest ame veradayene. 14’ê temmuze de zî Fatma hetê camêrdo ke ci dir zewicnayebî Kazim Altinmakasî ra ameye kiştene. Kazim ame tepiştene, la seba muracatê tepiştişê Sînanî hetê Dadgeha Cezaya Sulhî ya Milazgirî ra ame redkerdene.

	 

	Sewbîna ame dîyar kerdene ke seba ke Fatma tirkî nêzanayîne, vatişê aye derbazê qeydê fermî nêbîyê. Sebeb zî seba ke qereqolî de tercuman çin bîyo. La avûkatêke Baroya Mûşî ra bi Fatmaye dir tewrê îfadeyî bîya, dîyar kerd ke qereqolî hetê leşkerêk ra tercumanîyê Fatma ame kerdene. Walîtîya Mûşî zî îdia kerd ke Fatma bi tirkî zana.

	 

	Raya pêroyî reaksîyonî hemverê nêzdîbîyayîşî ke Fatma rê ameyo kerdene da. Sewbîna xeberê ke derheqê Fatma de zî bi sebebê ke, “Psîkolojîyê domanan xirab beno" ameyî qedexekerdene.

	 

	6 domanê Fatma 4 mengî Mudurîyê Şaristanî yê Xizmetê Komelî û Xebate, Keyeyî yê Mûşî de yenê pawitene.