Wa vengê tepişteyan bêro eşnawitiş 

2020-12-01 13:32:11


	 

	AMED - Keyeyê ke rewşa domananê xo yê ke zîndanan de yê bi endîşeyînê, bi destpêkerdişê grevê vêşanî endîşeyê înan di qat bî zêde. Dayîka Yazgul Şahîna tepişteyî, Zehra Şahîn veng da ke zîndanan de îhlalkerdişê heqan zêde bîyê û dîyar kerd ke ganî vengê tepişteyan bêro eşnawitiş.

	 

	Yew wareyêk tewr zêde îhlalkerdişê heqan yenê kerdene, zîndan ê. Bi  Vîrusa Koronayî (covıd-19) ke her ke şino vila beno, cuya tepişteyan hîna zaf kewena mîyanê tehlukeyî. Tepişteyê ke hemverê nê îhlalkerdişan qet bêveng nêmanenê, seba ke zere de yê, tewr zêde reaksîyonê xo bi grevê vêşanîye anê ziwan. Bi vilabîyayîşê şubeyê  koronayî û destpêkerdişê grevî dir endîşeyê keyeyan zî zêde bî. Înan ra yew zî keyeyê Yazgul Şahîna ke 4 serrî yo tepişte ya û Zîndanê Cinîyan ê Bunyanî yê Kayserî de ya. Dayîka Yazgule, Zehra Şahîna ke cuya kênaya xo ra endîşeyîn a wina va: "Ma zulm nêwazenê. Ma aştîye wazenê. Ma wazenê ke domanê ma binê zulmî ra vejîyê. Berê zîndanan wa bêrê akerdene û wa kes kezebê ma dayîkan nêveşno."

	 

	'Heme heqê înan yenê îhlalkerdene'

	 

	Zehra dîyar kerd ke Yazgul 2016 de ameya tepiştene. Vernê de berdî Tarsûs. Tarsûs ra zî surgunê Kayserî kerdî. Xeylê zulm kênaya mi rê yeno kerdene. Kitabê înan, înan ra yenê girewtene. Mektubê înan reyan nêdanê înan û xeylê heqê înan bîn yenê îhlalkerdene. Ma nêeşkenê înan ra zanayîş bigîrê. Ma wazenê ke no zulm serê ma ra û serê domananê ma ra bêro wedaritene. Wexto ke ma şinê zîndanan ke domananê xo bivînê, cigêrayîş kenê, çîyanê ma ra gênê.  Heta goşaranê ma zî ma ra gênê. Ma reyke şî serdayîşê Yazgule, înan mi ra va, 'ti seba kamî/e ameya?' Mi va, ez seba Yazgule ameya. Dima ra mi ra vatî, ti nêeşkena pê fistanê ke dayo xo ra bikewê zere. Bi no hawa keyeyan rê zulm kenê."

	 

	'Cezaya telefonî dayê înan'

	 

	Zehra ard ziwan ke çend rey cezaya telefonî dayê kênaya aye û embazanê aye û va: "Bi serrêk û nîm ma hema domanê xo nêdîyê. Xeylê kesî wina estê. Sewbîna nêverdenê tepişteyî embazanê xo zî bivînê. Zulm û heqaretan înan rê kenê. Wexto ke tepişteyî hemverê nê îhlalkerdişan vejênê zî ceza danê înan. Verê ma eşkayîne 20 deqeyan bi telefonî dir Yazgule dir qisey bikerê. La nika seba ceza dayê ma tena eşkenê 10 deqayan qisey bikerê. Ganî çîyêk winasî nêameyîne kerdene. Seba ke heqê înan çin o domananê ma rê zulm bikerê."

	 

	'Wa beranê zîndanî abikerê û zulm biqedo'

	 

	Zehra tewr peyîn wina va: "Hîn keyeyî estê, seba ke rewşa înan destûr nêdana, nêeşkenê şêrê domananê xo dir pêvînayîş bikerê. Keyeyan dûr fînenê. Kam hemverê zulmî vejîyo, veng vejo beno hedefê înan. Tena domana mi ney, domanê xeylêk kurdan zîndanan de yê. Wa êdî no zulm biqedo, ma aştîye wazenê. Wazena wa heme berayê zîndana bêrê akerdene. Nê pandemî de cuya domananê ma tewr zêde kewt binê tehluke. Wa waştişê tepişteyan bêrê qebûlkerdene.