‘Kênaya mi 7 rojan îşkence kerdî’ 

2020-11-30 15:57:22


	 

	COLEMÊRG - Dayîka Necla Ataka ke Zîndanê Tîpê F yê hûmara 1 ê Kandrayê Kocaeliyî de manena Emîne Atak, va: “Reyna grevê vêşanî ame destpêkerdene, ez veng dana dayîkan ke bêrê û ma hemverê şîdetê serê domananê xo de bibê yew.”

	 

	Necla Ataka ke Geverê Colemêrgî de 17ê teşrîna verêne 2017 de Qoserê Mêrdînî de amebî destbendkerdene û bi îdayê "Yewîya dewlete xira kerda”, "Rêxistin awan kerda û îdare kerda”, "Endama rêxistine ya" amebî destbendkerdene û dima ra amebî tepiştene. Seba Necla heta 200 serran cezaya zîndanî yena waştene. Necla wexto ke amebî destbendkerdene zî seba ke zanayîş nêdabî keyeyê aye 7 rojan grevê vêşanî de mendebî û dima ra zanayîş dabî keyeyê aye. Necla ke yew çalakgerê grevê vêşanîye ya, hemverê tecrîdê serê Rayberê PKKyî Abdullah Ocalanî de, 117 rojan grevê vêşanî de mendebî.

	 

	‘Kênaya mi rê 7 rojan îşkence kerdî’

	 

	Dayîka Necla ya tepiştî Emîne Atak, wina qalê kênaya xo kerd,  "Necla 4 serrî yo zindan de ya. 7 rojan desbendkerde mende û 7 rojan îşkence bi ci kerdî. La ma nêzanayîne, seba ke tu zanayîş nêdabî ma. Ma her ca de ci geyrayîne. O wext kênaya mi waşta ke zanayîş bido ma. La semedo ke zanayîş nêdayî ma, kewta grevê vêşanîye û dimayê 8 rojan zanayîş dayî ma. Ma persê şima çira zanayîş nêda ma kerd. La înan îda kerd ke zanayîş danê keyeyan, la keyeyî wayîr nêvejîyenê. Mi va tu keyeyêk çîyêk wina nêkeno. Kênaya mi nêmojnayî mi û tena fotografê aye ramojnayî. Wexto ke mi fotografê kênaya xo dî seba îşkenceyê ke aye rê amebi kerdene, zaf zeîf bibî. Destbendkerde de kênaya mi nêmojnayî û coka ma ver bi Wanî kewtî rayîr. Gama ke ma resayî Wan, telefonê ma kerdî û vatî şima eşkenê deqeyêk kênaya xo bivînê. Mi zî va şima zanê ke ma agêrayî coka şima gêrenê û înan zî va, o wext hewce nêkeno. Şima do aye dadgeh de bivînê. Dimayê ke kênaya mi ameye tepiştene bi 15 rojan vatî pêvînayîş esto û dima ra geyrayî vatî meyerê, seba ke kênaya şima berdê zîndanêk bîn. Seba ke ma kênaya xo nêvînê cayê aye vurnayî.”

	 

	‘Eke Necla ma goşdarî nêkero do heta peynî tîya de bo’

	 

	Wexto ke polîsan kênaya mi berdî dadgehe vatî, "Ma goşdarî bikero do demêk nêzdî de vejîyo la eke goşdarî nêkero do heta bi heya tîya de bo.” Emîne wina dewam kerd: "Ez tîya ra veng dana pêro dayîkan, wa bêrê û ma pîya seba domananê xo yê tepişteyan çareyêk bivînê. Reyna grevê vêşanî dest pêkerdî. Ez veng dana dayîkan û înan ra rica kena. Wa bêrê ke ma nê şîdetî serê domananê xo ra peynî bikerê. Ma domananê xo ra tewr bi qîmet nîyê. Şewe û roje teda vînenê.”

	 

	Necla yali Zîndanê hûmara 1 ê Tîpê F yê Kandirayê Kocaelî de manena, 28ê teşrîna peyêne de qiseykerdişê xo yê bi telefonî ke bi dayîka xo dir kerd wina vana, "Qawîşê ma de di embazê ma dest bi grev kerdî. La îdarekarê zîndanî erzeno serê qawîşe ma û vano, 'şima bîlasebeb grev de yê fek ci ra vera bidê’ û şîdet kenê.”