‘Ma nêeşkenê hewcedarîyanê xo bigîrê’ 

2020-11-30 15:18:46


	 

	WAN - Bi pandemî dir rewşa ekonomîya welatijan tewr xirab bî. Welatijê yê Wanî dîyar kerdî ke nika nêeşkenê bazar de hewcedarîyê xo yê rojane bigîrê. 

	 

	Tirkîya de her roja ke derbaz beno krîzê ekonomî kûr beno. Welatijê ke seba dayîşûgirewtişî verê xo danê bazaran, reyna dest veng agêrenê keyeyê xo. Dimayê vîrusê koranayî (Covîd-19) vila bi, hîn tedbîrî ameyî girewtene tewr zêde welatijî mexdûr bî. Seba ke nika rewşa ekonomîya welatijan dîyar o û bêkar mendiş, yan zî kar ra dûrvistiş bêpere tesîrêk negatîf serê welatijan de kerd.

	 

	Taxa Sixkî ya rayîrê Armûşî de hewte ra rojêk bazar yeno awankerdene. Welatijê taxa seba dayîşûgirewtişî verê xo danê bazar. Înan ra yew zî Sosin Baycan a. Sosine waşt seba kênaya xo kazaxêk 25 TL yo bigîro û va: “Mi bazar de tena kazaxêk girewt, seba ke pereyê mi hende yo. Lajê mi kafe de xebityeno. Seba nêweşîya korana kar ra ame dûrfistene. Lajê mi hezar û 400 TL pere girewtêne û debara 10 kesî kerdêne. Qîm nêkerdêne la reyna zî çîyêk ameyîne keye. Mi nika seba kênaya xo kazaxêk girewt la ez nêzana ez o domanê xo yê bînan ra çi vajî.”

	 

	Nazdar Mete, seba kêmîyê keyeyî temam bika, verê xo daya bazar û wina va: “Mi waştêne ke ez telîsêk kartol bigîrî la kîloyê kartolan 7 û 11 TL û ez nêeşkena bigîrî. Seba zimistanî mi waştêne ke ez domananê xo rê cilê zimistanî bigîrî la seba vayîye ez nêeşkaya bigîrî.”

	 

	Keyeyê Sîtî Akdage de zî 8 kesî ciwîyenê bi 25 TL dayîşûgirewtiş kena û verê xo dana keyeyê xo. Sîtî wina ercnayîş kerd: “Ez şikur kena seba ke hîn keyeyî estê qet nêeşkenê dayîşûgirewtiş bikerê.”