Cinîyê HDPyijî vengdayîşê yewîya neteweyî kerdî 

2020-11-30 13:34:57


	 

	COLEMÊRG - Hemsereka HDPyî ya Şaristanê Colemêrgî Sînem Seven bale ant serê girîngîyê yewîya neteweyî ya seba kurdan û va ke ganî astengîyê hemverê yewîya netweyî werte ra bêrê wedaritene û pêro kurdî seba yewîye bikewê mîyanê tevgerî.

	 

	Alozîyê ke seba Partîya Demokratî ya Kurdistanî (PDK) bi paştdayîşê Tirkîya waşt hêzê xo wareyê gerîlla de bi ca bikero Herêma Federal a Kurdistanî vejîya dewam keno. Pêwa vengdayîşê xeylê roşnvîr, hunermend û siyasetmedarê kurdî seba yewîye hema PDKyî tu game nêeşto. Sîneme Seven veng da Mesut Barzanî û wina va, "Şerê ke ewro wazeno bido destpêkerdene do siba dewletê îşxalkerdene hemverê ey bidê destpêkerdene. Seba ke dewletê îşxalkerdoxî wazenê kurdan çin bikerê.”

	 

	‘Pêwa şerê hemverê îşxalkerdoxan mîyanê ma de zî şer esto’

	 

	Sîneme dîyar kerd ke verê û dima ra kurdî waştê ke çar parçeyê Kurdistanî de yewîya xo awan bikerê û tu cîyayî mabêne kurdê ke Sîne, Qamişo û Colemêrgî de yê çin o. Sîneme ard ziwan ke seba yewîye çi destê cinîyan ra bêro do seba yewîye bikerê û wina va: "Ma seba yewîya neteweyî bi ca bîyarê amade yê û çi destê ma ra bêro ma do bikerê. Ma kurdî pêwa şerê ke ma hemverê dewletê îşxalkerdene kenê mîyanê xo de zî şer kenê. Şerê birakiştişî de zî şer kenê. Şerê birakiştişî de hêsrê çimanê ma şerman ra varenê û nika ma nê çî ciwîyenê. PDK wazeno şerêk bi nê rengî bido destpêkerdene. La ma hemverê nê yê.”

	 

	‘Ganî fek şerî ra vera bidê’

	 

	Sîneme veng da Barzanî zî û va: "Wa Barzanî nêkero xo vîr ra ke şerê ke wazeno kurdan pîya bido qirkerdiş do siba dewletê îşxalkerdoxî zî hemverê ey şer bikerê. Seba ke o zî

	Kurd o û dewletê îşxalkerdoxî wazeno kurdan çin bikerê. Coka wa şerê mîyanî kurdan nêro destpêkerdene û dayîkî nêbermê.”

	 

	‘Ganî şerê birakiştişî nêro destpêkerdene’

	 

	Sîpan Turan zî dîyar kerd ke tarîx de çi ameyo serê kurdan seba ke yewîya xo bi ca nêardê û wina va: "Seke vizêr eke ewro zî kurdî nêbê yew, do nêeşkê bîyayîşê xo bidê ispatkerdene û do destkewtişê xo yê bîyaye zî dest bidê. Ganî êdî dayikê kurdî nêbermê û şerê yewbînankiştişî bi ca nêro. Ganî astengîyê vernîya yewîye bêro wedaritene û seba yewîye têkoşîn bêro dayene.”