Merdimê Vindîbîyayeyan Tahîr Elçî ard vîr 

2020-11-28 16:07:16


	 

	AMED - Merdimê Vindîbîyayeyan çalakîya xo ya hewteyê 616 de Serekê Baroyê Amedî Tahîr Elçî ke 28ê Teşrîna Peyêne 2015 de ame qetilkerdene, ardî xo vîr.

	 

	Merdimê Vindîbîyayeyan û Komeleya Heqê Merdiman (ÎHD) ê Şubeyê Amedî hewteyê 616 de çalakîya “Wa vindîbîyayeyî bêrê vînayene û kiştoxî bêrê muhakemekerdene' serê înternet de organîze kerd. Her hewte hîkayeya vindîbîyayêk yena vîrardene. No hewte zî hîkayeya Serekê Baroyê Amedî Tahîr Elçî ke 28ê Teşrîna Peyêne 2015 de verê Mînareyê Çar Lingî yê Sûrî de qetil kerdibî.

	 

	Serekê Şubeyê ÎHDyî Abdullah Zeytûn serê nameyê Merdimê Vindîbîyayeyan Tahîr Elçî ard vîr û hîkayeya ey vila kerd. Abdullahî dîyar kerd ke Tahîr Elçî endamê komeleya înan bi û serrê 1990 de avûkatîyê mexdûrê înfazê bêhukm, kerdoxê nêdîyar û veşnayîşê dewan bi. Abdullah dîyar kerd ke ê do têkoşîno Tahîrî ke nimcet mendo dewam bikerê û seba edaletî têkoşîn bikerê.